Meyit donorluğunun həyata keçirilməsində ən vacib mərhələlərdən biri prosesin düzgün, operativ və qüsursuz koordinasiya olunmasıdır. Orqan transplantasiyasında hər bir saniyə bir insanın həyatı ilə birbaşa bağlı olduğundan, bu prosesin vaxtında və dəqiq idarə edilməsi həlledici rol oynayır. Koordinasiya sistemi donorun müəyyənləşdirilməsindən başlayaraq orqanların uyğun resipiyentlərlə (orqan köçürülən şəxs) uyğunlaşdırılması, tibbi heyətin səfərbər edilməsi və əməliyyatların icrasına qədər bütün mərhələləri əhatə edən vahid zəncir kimi fəaliyyət göstərir.

Azmedinfo.az-a verilən məlumata görə Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinin sədri Yeganə Abbasova bildirir ki, meyit donorluğu yüksək səviyyədə logistika və dərin mənəvi məsuliyyət tələb edən mürəkkəb idarəetmə prosesidir.

Onun sözlərinə görə, beyin ölümü təsdiqləndiyi andan etibarən orqanların bioloji funksiyasının qorunması üçün regional şöbələrin, laboratoriyaların və cərrahiyyə komandalarının eyni vaxtda və təxirəsalınmaz şəkildə səfərbər olunması vacibdir. Komandalararası operativ əlaqə və koordinasiya bu sistemin uğurunu müəyyən edən əsas amillərdən biridir və hər bir gecikmə insan həyatı üçün ciddi risk yaradır. Strateji məqsəd bu funksional zəncirin fasiləsizliyini təmin etməkdir.

Koordinasiya Mərkəzi eyni zamanda donor ailələri ilə həssas və peşəkar ünsiyyətin qurulması, həmçinin cəmiyyətdə orqan donorluğu mədəniyyətinin formalaşdırılması istiqamətində mühüm missiyanı həyata keçirir.

Məhz bu operativ və fasiləsiz fəaliyyət göstərən sistemin nəticəsində uğurlu transplantasiya əməliyyatları icra olunur və meyit donorlardan götürülən orqanlar təxirəsalınmaz şəkildə ehtiyacı olan xəstələrə köçürülür. Bu koordinasiyanın yaratdığı imkanlar sayəsində bir çox pasiyentə ikinci həyat şansı verilir və onlar yenidən sağlamlıqlarına qovuşurlar.