Fransada təxminən son 10 gündür davam edən güclü isti hava şəraiti ciddi nəticələrə səbəb olub. Ölkədə sərinləmək məqsədilə çay, göl və dənizlərə girən ən azı 40 nəfər son beş gün ərzində boğularaq həyatını itirib.

Azmedinfo.az "Anadoli Ajansı"na istinadən yazır ki, Fransa rəsmilərinin məlumatına görə, ölkənin bir çox bölgəsində temperatur normadan xeyli yüksək səviyyəyə çatıb. Həddindən artıq istilərin təsiri ilə insanlar kütləvi şəkildə su hövzələrinə üz tuturlar ki, bu da boğulma hadisələrinin sayının artmasına gətirib çıxarıb.

Meteoroloji xidmətin açıqlamasına əsasən, bu gündən etibarən ölkənin 54 departamentində (vilayətində) təhlükə səviyyəsi ən yüksək həddə – qırmızı xəbərdarlıq səviyyəsinə qaldırılıb.

Mütəxəssislər vətəndaşlara xüsusilə nəzarətsiz çimərliklərdə üzməkdən çəkinməyi, günün ən isti saatlarında açıq havada uzun müddət qalmamağı və bol maye qəbul etməyi tövsiyə edirlər.

Qeyd edək ki, Avropanın bir sıra ölkələrində müşahidə olunan isti hava dalğası Fransada da səhiyyə və fövqəladə xidmətlər üçün əlavə yük yaradıb. Səlahiyyətli qurumlar əhalini hava xəbərdarlıqlarına ciddi əməl etməyə çağırırlar.