Yeni orqan, yeni həyat, yeni ümid

04 İyul 2026

338

Transplantasiya əməliyyatından sonrakı ilk sabah yeni bir başlanğıcdır. Əməliyyatdan sonra bədən sanki yenidən canlanır və yavaş-yavaş özünü bərpa etməyə başlayır. Bu dövrdən başlayaraq pasiyentlər üçün hər gün fərqli bir məna daşıyır. Onlar tədricən gündəlik həyata qayıdır, işlərinə davam edir və xəstəlikdən əvvəlki sosial mühitlərinə yenidən qoşulurlar.

Azmedinfo.az Orqan Donorluğu və Transplantasiyası üzrə Koordinasiya Mərkəzinin maaarifləndirici sosial media paylaşımını izləyiciləri ilə bölüşür.

Müntəzəm həkim nəzarəti və dərman qəbulu yeni orqanı qorumaq üçün zəruri bir qaydadır. İkinci həyat şansının bir şərti də orqanizmi qorumaqdır.

Cəmiyyətdə belə bir yanlış təsəvvür var ki, transplantasiya keçirən insanlar aktiv həyat tərzinə qayıda bilmirlər. Əslində isə bu əməliyyatın əsas məqsədi insanın həyat keyfiyyətini artırmaq, onu yenidən ailəsinə və cəmiyyətə qazandırmaqdır. Əgər pasiyent əvvəllər səhhətinə görə işləyə, təhsil ala və ya ailə qura bilmirdisə, uğurlu əməliyyatdan sonra bütün bu arzularını gerçəkləşdirə bilər.

Reabilitasiya prosesi təkcə fiziki deyil, həm də mənəvi uyğunlaşma dövrüdür. Əməliyyatdan sonra bir çox insanın həyata baxışı kökündən dəyişir. Onlar zamanın qədrini daha yaxşı bilir, öz potensiallarını kəşf edir və həyatlarını daha mənalı yaşamağa çalışırlar.

Azərbaycanda meyit donordan ilk orqan köçürülməsi 2025-ci ildə baş tutub. Bu həyat hədiyyəsi sayəsində onlarla insan sağlamlığına qovuşub. İkinci ömrünü yaşayan bu insanlar çətin sınaqdan qalib ayrılmağın verdiyi əzmlə təhsil alır, işləyir, həyata yeni enerji ilə bağlanırlar. Onlar həyatın hər anının dəyərini daha dərindən anlayır, donorun ruhuna sonsuz ehtiram bəsləyir və çox vaxt özləri də orqanlarını bağışlamaq qərarı verirlər. Donorun həyatını davam etdirmək onlarda əlavə bir məsuliyyət hissi yaradır. Bu hiss onları cəmiyyət üçün daha aktiv, daha xeyirxah işlər görməyə sövq edir.