Qurd xəstəlikləri və ya helmintozlar insan orqanizmində müxtəlif növ parazit qurdların yaşaması və çoxalması nəticəsində yaranan yoluxucu-parazitar xəstəliklərdir.

Azmedinfo.az İctimai Səhiyyə və İslahatlar Mərkəzinin məlumatına istinadən yazır ki, bu xəstəliklər həm uşaqlarda, həm də böyüklərdə rast gəlinə bilər və vaxtında aşkarlanmadıqda sağlamlıq üçün ciddi problemlərə səbəb ola bilər.

Helmintozlar parazitin növündən asılı olaraq müxtəlif əlamətlərlə özünü göstərir. Ən çox rast gəlinən simptomlara qarın ağrısı, iştaha dəyişiklikləri, ürəkbulanma, yorğunluq, halsızlıq, çəki itkisi, ishal və ya qəbizlik, anal nahiyədə qaşınma, eləcə də bəzi hallarda allergik səpgilər daxildir. Bəzi insanlarda xəstəlik uzun müddət heç bir əlamət vermədən də inkişaf edə bilər.

Qurd xəstəliklərindən qorunmağın ən təsirli yolu şəxsi gigiyena qaydalarına ciddi riayət etməkdir. Əllərin yeməkdən əvvəl, tualetdən sonra və çöldən evə gəldikdə sabun və axar su ilə yaxşı yuyulması parazit yumurtalarının orqanizmə daxil olmasının qarşısını əhəmiyyətli dərəcədə alır. Bundan əlavə, meyvə və tərəvəzlərin yaxşı yuyulması, ət və balıq məhsullarının tam bişirilməsi, təmiz içməli sudan istifadə edilməsi də yoluxma riskini azaldır.

Qurd xəstəliyindən şübhələnildikdə özbaşına dərman qəbul etmək düzgün deyil. Diaqnoz yalnız həkim müayinəsi və laborator analizlər əsasında qoyulmalı, müalicə isə həkim təyinatına uyğun aparılmalıdır. Vaxtında diaqnostika və düzgün müalicə ilə helmintozlardan tam sağalmaq mümkündür.