Hər gün insulin iynəsi vurmaq məcburiyyətini aradan qaldıra biləcək inqilabi texnologiya hazırlanıb. Alimlər insulinin dəri vasitəsilə orqanizmə keçməsini təmin edən xüsusi polimer hazırlayıblar.

Azmedinfo.az "Medikforum" nəşrinə istinadən yazır ki, bu yeni üsul dərinin qoruyucu baryerini keçərək insulinin birbaşa qana daxil olmasına imkan verir. Gələcəkdə bu texnologiya diabet xəstələri üçün insulin tərkibli bantların və ya gellərin hazırlanmasına yol aça bilər.

İynəsiz insulin texnologiyası

Sürətli və uzunmüddətli təsir: Diabetli siçanlar və miniatür donuzlar üzərində aparılan sınaqlarda dəriyə tətbiq olunan gelin qan şəkərini 1–2 saat ərzində normal səviyyəyə endirdiyi və təsirinin 12 saata qədər davam etdiyi müşahidə olunub.

Necə işləyir? Xüsusi hazırlanmış polimer dərinin təbii pH fərqindən istifadə edərək əvvəlcə xarici təbəqəyə yapışır, daha dərin qatlara keçdikdə isə quruluşunu dəyişərək insulinin qana daşınmasını təmin edir.

Növbəti mərhələ – insanlar üzərində sınaqlar: Mütəxəssislər əldə olunan nəticələrin olduqca ümidverici olduğunu bildirirlər. Lakin texnologiyanın insanlar üçün tam təhlükəsiz və effektiv olduğunun təsdiqlənməsi məqsədilə klinik sınaqların başa çatdırılması tələb olunur.