Piylənmə və tip 2 diabetin müalicəsi üçün hazırlanan "Elecoglon" adlı yeni tablet kimi qəbul edilən dərman II faza klinik tədqiqatlarda müsbət nəticələr göstərib.

Azmedinfo.az xəbər verir ki, endokrinoloq Fərhad Burduzunun sözlərinə görə, dərmanın üstünlüklərindən biri onun qəbulunda qida və ya su ilə bağlı xüsusi məhdudiyyətlərin olmamasıdır.

Həkim qeyd edib ki, araşdırmada artıq çəkili və ya piylənməsi olan iştirakçılar arasında 26 həftə ərzində 10,5%-ə, 36 həftənin sonunda isə 11,8%-ə qədər çəki azalması müşahidə edilib. Tip 2 diabetli xəstələrdə isə HbA1c göstəricisi 1,88%-ə qədər azalıb, eyni zamanda aclıq qan şəkəri və bədən çəkisində də yaxşılaşma qeydə alınıb. Bundan əlavə, bəzi iştirakçılarda qan təzyiqi və iltihabla əlaqəli göstəricilərdə də azalma müşahidə olunub.

Ekspert müalicə zamanı ən çox rast gəlinən yan təsirlərin ürəkbulanma, qəbizlik, ishal və qusma olsa da, bu əlamətlərin əsasən yüngül olduğunu və daha çox müalicənin ilk dövrlərində, doza artırılarkən ortaya çıxdfığını deyib.

"Alimlər əldə olunan nəticələri ümidverici hesab etsələr də, preparat hələ araşdırma mərhələsindədir və onun effektivliyi ilə təhlükəsizliyini daha dəqiq qiymətləndirmək üçün III faza klinik tədqiqatlar davam etdirilir", -deyə həkim vurğulayıb.