ABŞ-da uzun illər "dəmir ağciyər" adlanan süni tənəffüs aparatından istifadə edən son pasiyent vəfat edib.

Azmedinfo.az "Oklahoma's News 4" telekanalının məlumatına istinadən yazır ki, pasiyent Marta Lillard 1953-cü ildə, ABŞ-da poliomielitə qarşı peyvəndin geniş tətbiqindən iki il əvvəl bu xəstəliyə yoluxmuşdu. O zaman onun cəmi 5 yaşı var idi.

Marta Lillardın həyatı 73 il ərzində "dəmir ağciyər" adlanan süni tənəffüs cihazı ilə dəstəklənib. Xəstəliyin ilk illərində o, günün 23 saatını aparatın içərisində keçirirdi. Sonrakı dövrlərdə isə cihazdan yalnız yuxu zamanı istifadə edirdi. Lakin həyatının son səkkiz ayında yenidən sutkanın 24 saatını bu aparatın içində keçirməyə məcbur olmuşdu.

Zaman keçdikcə cihaz sıradan çıxmağa başlayıb. Aparatın bəzi hissələri 1940-cı illərdən qaldığı üçün onların ehtiyat hissələrini tapmaq demək olar ki, mümkün olmayıb. Bundan əlavə, pasiyent tibbi xidmətə çıxışla bağlı çətinliklər yaşayır, həmçinin "dəmir ağciyər"in iş prinsipini bilən mütəxəssislərin sayı getdikcə azalırdı.

Məlumatda bildirilir ki, Marta Lillard vəfat etdikdən sonra onun cəsədi 73 ildən sonra ilk dəfə "dəmir ağciyər" aparatından çıxarılıb və o, nəhayət bu cihazdan kənarda əbədi rahatlıq tapıb.

"Dəmir ağciyər" nədir?

"Dəmir ağciyər" tənəffüs əzələlərini idarə etmək qabiliyyətini itirmiş xəstələrin nəfəs almasını təmin edən hermetik kameraya malik mexaniki süni tənəffüs cihazıdır. Bu cür vəziyyət poliomielit, botulizm və bəzi zəhərlənmələr zamanı yarana bilər. Müasir tibbdə isə bu texnologiyanı daha təhlükəsiz, səmərəli və kompakt süni ventilyasiya sistemləri əvəz edib.

Poliomielitə qarşı peyvəndlərin geniş tətbiqi nəticəsində dünyada bu xəstəliyin yayılması kəskin azalıb və "dəmir ağciyər" kimi cihazlara ehtiyac demək olar ki, aradan qalxıb. Bu hadisə peyvəndlərin yoluxucu xəstəliklərin qarşısının alınmasında və ağır fəsadların azaldılmasında oynadığı mühüm rolu bir daha nümayiş etdirir.