Tibbi tədqiqatlar sahəsində mühüm irəliləyiş hesab edilən yeni bir yanaşma təqdim olunub. Alimlər təbabətin ən çətin müalicə olunan xəstəliklərindən biri sayılan aqressiv beyin şişləri, o cümlədən qlioblastoma ilə mübarizə üçün indiyədək sınaqdan keçirilməmiş innovativ üsul üzərində çalışırlar.

Azmedinfo.az "Labmedya" nəşrinin məlumatına istinadən yazır ki, yeni yanaşma qızılın mikroskopik ölçülü nanohissəciklərindən istifadə etməklə xərçəng hüceyrələrini birbaşa hədəfə almağı nəzərdə tutur.

Hazırlanan müalicə strategiyası burun yolu ilə tətbiq edilən qızıl nanohissəciklərinə əsaslanır. Tədqiqatçılar müəyyən ediblər ki, xüsusi quruluşa malik bu hissəciklər burun boşluğundan keçərək qan-beyin baryerini maneəsiz aşır və birbaşa beyin toxumasına çatır. Bu isə beyin şişlərinin müalicəsində ən böyük çətinliklərdən biri hesab olunan dərmanın birbaşa şiş nahiyəsinə çatdırılması problemini aradan qaldıra bilər.

Bu yanaşmanın gələcəkdə qlioblastoma kimi aqressiv beyin şişlərinin daha effektiv müalicəsinə imkan yaradacağı gözlənilir. Hazırda metodun təhlükəsizliyi və effektivliyi ilə bağlı tədqiqatlar davam edir.