Akdəniz Universiteti Xəstəxanasında 36 yaşlı M.B.-yə təxminən 14 saat davam edən əməliyyat nəticəsində meyit donordan uşaqlıq köçürülüb. Türkiyədə bu üsulla həyata keçirilən üçüncü uşaqlıq transplantasiyasından sonra pasiyentin vəziyyətinin qənaətbəxş olduğu bildirilib.

Azmedinfo.az "TRT Haber"ə istinadən yazır ki, Antalyada yaşayan M.B. uşaqlıq transplantasiyası əməliyyatı üçün 11 il əvvəl Akdəniz Universiteti Xəstəxanasına müraciət etmişdi.

Şəhərdə beyin ölümü baş vermiş donorun bağışlanan orqanları arasında uşaqlıq da olduğu üçün pasiyent xəstəxanaya dəvət olunub.

Əməliyyat Türkiyədə ilk üz və ikiqat qol transplantasiyasını, həmçinin dünyada meyit donordan ilk uşaqlıq transplantasiyasını həyata keçirmiş Organ Transplantasiyası və Qabaqcıl Səhiyyə Araşdırmaları İnstitutunun direktoru, professor Ömər Özkan, Akdəniz Universitetinin rektoru, professor Özlənən Özkan və onların rəhbərlik etdiyi komanda tərəfindən icra olunub.

Təxminən 20 nəfərlik tibbi heyətin iştirakı ilə əməliyyata səhər saat 09:00-da başlanılıb və 14 saatdan sonra uşaqlıq transplantasiyası uğurla başa çatdırılıb.

Hazırda M.B.-nin vəziyyətinin stabil olduğu, müşahidə məqsədilə reanimasiya şöbəsinə yerləşdirildiyi bildirilib.

Türkiyədə ilk uşaqlıq transplantasiyası

Türkiyədə ilk meyit donordan uşaqlıq transplantasiyası uşaqlığı olmadığı üçün hamilə qala bilməyən Dərya Sərtə 8 avqust 2011-ci ildə həyata keçirilmişdi. O zaman 23 yaşında olan pasiyentə professor Ömər Özkanın rəhbərlik etdiyi komanda tərəfindən təxminən 7 saat davam edən əməliyyat aparılmışdı.

Müalicə prosesindən sonra Dərya Sərt 26 iyun 2020-ci ildə hamiləliyinin 28-ci həftəsində dünyaya oğlan övladı gətirib. Körpəyə əməliyyatı həyata keçirən cərrahın şərəfinə Ömər Özkan adı verilib.

İkinci transplantasiya da uğurlu nəticə verib

Türkiyədə ikinci meyit donordan uşaqlıq transplantasiyası 27 iyul 2021-ci ildə Akdəniz Universiteti Xəstəxanasında Havva Erdemə edilib. Professor Özlənən Özkan və professor Ömər Özkanın rəhbərlik etdiyi komanda tərəfindən həyata keçirilən əməliyyat 8,5 saat davam edib.

Havva Erdem 29 sentyabr 2022-ci ildə sağlam qız övladı dünyaya gətirib. Ailəsi körpəyə Özlənən adını verib.