Hər il 25 iyul tarixində qeyd olunan Ümumdünya Suda Boğulmaların Qarşısının Alınması Günü insanların diqqətini suda boğulma hallarının qarşısının alınmasının mümkünlüyünə yönəltmək məqsədi daşıyır.

Azmedinfo.az xəbər verir ki, dünyada hər il yüz minlərlə insan suda boğulma nəticəsində həyatını itirir və bu halların əksəriyyəti sadə təhlükəsizlik qaydalarına əməl etməklə önlənə bilər.

Yay mövsümündə çimərliklərdə, göllərdə və çaylarda istirahət edərkən təhlükəsizlik qaydalarına riayət etmək xüsusilə vacibdir. Yalnız nəzarət olunan və üzmək üçün nəzərdə tutulmuş ərazilərdə suya daxil olun, uşaqları bir an belə nəzarətsiz qoymayın, alkoqol və digər diqqəti zəiflədən vasitələrin təsiri altında suya girməyin, hava şəraitini və suyun vəziyyətini nəzərə alın.

Unutmayaq ki, bir anlıq ehtiyatsızlıq ağır xəsarətlərə və ya faciəvi nəticələrə səbəb ola bilər. Məsuliyyətli davranış, düzgün seçim və təhlükəsizlik qaydalarına əməl etmək həm öz həyatınızı, həm də yaxınlarınızın həyatını qoruya bilər.

Təhlükəsizlik qaydalarına əməl edin – su təhlükəsizliyi həyat qurtarır!