Bakıda və Abşeron yarımadasında tozlu hava şəraiti müşahidə olunur. Milli Hidrometeorologiya Xidmətinin avtomatik müşahidə stansiyalarından əldə olunan məlumatlara əsasən, hazırda havada tozun miqdarı normadan 1,4–1,7 dəfə yüksəkdir. Bu barədə Milli Hidrometeorologiya Xidmətinin rəsmisi Gülnarə Abbasova məlumat verib.

Azmedinfo.az xəbər verir ki, onun sözlərinə görə, havada müşahidə olunan toz meteoroloji şəraitlə əlaqədar lokal xarakter daşıyır.

"Hazırda müşahidə olunan tozlu hava şəraitinin əsas səbəbi bu gün səhər saatlarından etibarən əsən güclü şimal-qərb küləyidir. Külək yer səthinin quru qatında formalaşan toz kütlələrini ətraf ərazilərə yayaraq atmosferdə tozun miqdarını artırıb", – deyə Gülnarə Abbasova bildirib.

Milli Hidrometeorologiya Xidmətinin proqnozuna görə, tozlu hava şəraiti sinoptik vəziyyətlə əlaqədar sabah günorta saatlarınadək davam edəcək.