Hər il 28 iyul tarixində qeyd olunan Ümumdünya Hepatit Günü virus hepatitləri barədə məlumatlılığın artırılması, erkən diaqnostika və profilaktik tədbirlərin təşviqi məqsədi daşıyır. Qaraciyər orqanizmdə maddələr mübadiləsini tənzimləyən, zərərli maddələri zərərsizləşdirən və həyat üçün vacib funksiyalar yerinə yetirən əsas orqanlardan biridir. Buna görə də onun sağlamlığının qorunması ümumi sağlamlığın ayrılmaz hissəsidir.

Azmedinfo.az xəbər verir ki, mütəxəssislərin bildiridiyinə görə, vius hepatitləri, xüsusilə hepatit B və hepatit C uzun müddət heç bir əlamət vermədən inkişaf edə bilər. İnsan özünü tam sağlam hiss etsə də, xəstəlik illər ərzində qaraciyərdə ciddi zədələnmələrə səbəb ola bilər. Vaxtında aşkar edilmədikdə bu infeksiyalar qaraciyər sirrozu və qaraciyər xərçəngi kimi ağır fəsadlarla nəticələnə bilər. Məhz buna görə risk qrupuna daxil olan şəxslərin mütəmadi müayinədən keçməsi böyük əhəmiyyət daşıyır.

Hepatit B-yə qarşı etibarlı və effektiv peyvənd mövcuddur. Peyvənd həm uşaqları, həm də böyükləri bu təhlükəli infeksiyadan qorumağın ən təsirli yollarından biridir. Hepatit C üçün isə peyvənd olmasa da, müasir antiviral müalicə üsulları xəstəliyin tam sağalmasına imkan yaradır. Bunun üçün infeksiyanın erkən mərhələdə aşkarlanması vacibdir.

Qaraciyərin sağlamlığını qorumaq üçün yalnız virus hepatitlərindən qorunmaq kifayət deyil. Sağlam qidalanmaq, alkoqoldan uzaq durmaq, həkim məsləhəti olmadan dərman qəbul etməmək, təhlükəsiz tibbi və kosmetoloji prosedurlara üstünlük vermək, şəxsi gigiyena qaydalarına riayət etmək və mütəmadi tibbi müayinələrdən keçmək qaraciyərin normal fəaliyyətinin qorunmasına kömək edir.

Ümumdünya Hepatit Günü hər kəs üçün öz sağlamlığına daha məsuliyyətlə yanaşmaq üçün mühüm bir çağırışdır. Sadə bir qan analizi ilə hepatit B və C infeksiyalarını erkən aşkar etmək mümkündür. Unutmayaq ki, vaxtında müayinə, peyvənd və erkən diaqnostika minlərlə insanın həyatını xilas edə, qaraciyərin sağlamlığını qoruyaraq sağlam gələcəyin əsasını qoya bilər.