Böyümənin ilk günlərində körpənin immunitet sistemi hələ tam formalaşmadığı üçün o, müxtəlif infeksion xəstəliklərə qarşı daha həssas olur.

Azmedinfo.az xəbər verir ki, həkim-pediatr Fərəh Əsədovanın sözlərinə görə, Azərbaycan Respublikasının Səhiyyə Nazirliyi və TƏBİB tərəfindən tətbiq edilən Milli Peyvənd Təqvimi infeksiyalara qarşı ən effektiv və təhlükəsiz müdafiə üsuludur.

Həyatın ilk 48 saatı ərzində doğum evində vurulan BCG peyvəndi körpəni vərəmin ağır və həyati təhlükə yaradan formalarından qoruyur. Eyni zamanda tətbiq edilən Hepatit B peyvəndinin ilk dozası qaraciyərin zədələnməsinin və xroniki infeksiyaların qarşısını almaq üçün ilkin müdafiə qatı yaradır. Körpə 2 aylığına çatdıqda isə bir iynə ilə Difteriya, Göyöskürək, Tetanoz, Hepatit B, Poliomielit və Hib infeksiyasına qarşı müqavimət formalaşdıran Heksavalent vaksini vurulur. Bununla yanaşı tətbiq olunan Pnevmokok peyvəndinin 1-ci dozası uşaqlarda tez-tez rast gəlinən pnevmoniya xəstəliyinin qarşısını almağa xidmət edir.

Mütəxəssislər bildirirlər ki, istifadə olunan bütün peyvəndlər beynəlxalq keyfiyyət standartlarına tam cavab verir və yüksək dərəcədə təhlükəsizdir. İnyeksiyadan sonra müşahidə olunan yüngül qızdırma, iynə yerində qızartı və narahatlıq normal immunitet reaksiyası hesab olunur və adətən 1–2 gün ərzində öz-özünə keçib gedir. Uşağın orqanizmində maksimum müdafiə səviyyəsinin yaranması üçün vaksinlərin müəyyən olunmuş cədvələ uyğun, vaxtında vurulması böyük əhəmiyyət kəsb edir. Unutmayın ki, peyvəndləmə övladınızı ağır infeksiyalardan və onların fəsadlarından qorumağın ən etibarlı yoludur və cədvəllə bağlı istənilən sualınız olduqda ərazi üzrə uşaq poliklinikasının sahə pediatrı ilə məsləhətləşməyiniz tövsiyə olunur.