Ana südü yeni doğulmuş körpələr üçün yalnız ideal və əvəzolunmaz qida mənbəyi deyil, həm də onları müxtəlif yoluxucu və xroniki xəstəliklərdən qoruyan təbii bir qalxandır. Tərkibindəki zəngin vitaminlər, minerallar və immun sistemini möhkəmləndirən antitellər sayəsində ana südü körpənin fiziki və əqli inkişafının təməl daşını təşkil edir.

Azmedinfo.az xəbər verir ki, hər il 1–7 avqust tarixlərində dünya miqyasında “Ümumdünya Ana Südü ilə Qidalanma Həftəsi” qeyd olunur. Bu beynəlxalq maarifləndirmə kampaniyasının əsas məqsədi ana südünün uşaq sağlamlığındakı müstəsna rolunu geniş ictimaiyyətə çatdırmaq, anaları bu təbii prosesə təşviq etmək və cəmiyyətdə düzgün emosional və sosial dəstək mühiti formalaşdırmaqdır.

Gələcəyimiz olan uşaqların daha sağlam mühitdə böyüməsinə diqqət çəkmək və ana südü ilə qidalanmanın həyati əhəmiyyətini vurğulamaq məqsədilə ölkəmizdə də bu mühüm həftə çərçivəsində müxtəlif maarifləndirici tədbirlərə start verilib.

Ümumdünya Səhiyyə Təşkilatı (ÜST) və UNICEF körpənin həyatının ilk 6 ayında yalnız ana südü ilə (heç bir əlavə su və ya qida vermədən) qidalandırılmasını vacib sayır. 6-cı aydan etibarən isə adekvat və təhlükəsiz tamamlayıcı qidalarla yanaşı, ana südü ilə qidalandırmanın 2 yaş və ya daha yuxarı yaşa qədər davam etdirilməsi tövsiyə olunur.