9 yaşlı Binyamin Mirzəbəkov son üç ildir böyrək çatışmazlığı ilə mübarizə aparır. Xəstəlik ona altı yaşında diaqnoz qoyulub və zaman keçdikcə vəziyyəti daha da ağırlaşıb. Hazırda Binyaminin həyatı dializ müalicəsindən asılıdır. Dializ böyrəklərin bəzi funksiyalarını müvəqqəti şəkildə əvəz etsə də, bu müalicə transplantasiyanı əvəz edə bilmir.

Azmedinfo.az xəbər verir ki, Binyaminin atası Elxan Mirzəbəkov oğlunun yaşadığı çətinlikləri belə təsvir edir:

"Uşağın bədəni göyərir, iştahası olmur, sürətlə arıqlayır, nəfəs almaqda çətinlik çəkir, zaman-zaman qıcolmalar keçirir. Həftədə üç gün onu dializə aparıram. Dializdən sonra isə güclü ağrıları olur. Bu, həm fiziki, həm də mənəvi baxımdan çox ağırdır."

Ailə Xaçmazda yaşayır. Elxan Mirzəbəkov deyir ki, oğlunun xəstəliyi onun da həyatını tamamilə dəyişib. Binyaminin müalicəsi və qayğısı bütün vaxtını aldığı üçün işləmək imkanları da xeyli məhdudlaşıb.

Ötən il ailə Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinə müraciət edərək Binyaminin transplantasiya üçün qeydiyyata alınmasına nail olub.

Canlı donor tapılması üçün ailə üzvlərinin uyğunluğu yoxlanılıb. Lakin yaxın qohumlar arasında uyğun donor tapılmayıb. Yalnız nənəsinin uyğun olduğu müəyyən edilsə də, onun yaşı ilə bağlı tibbi göstərişlərə əsasən transplantasiyanın həyata keçirilməsi mümkün sayılmayıb.

Atanın ən böyük arzusu oğlunun yenidən sağlam uşaqlıq illərinə qayıtmasıdır:

"Öz ürəyimi belə övladıma verərəm, təki o yaşasın."

Binyamin və onun kimi orqan gözləyən onlarla uşaq üçün hər saniyə həyatla ölüm arasında gedən ağır mübarizədir. Canlı donoru olmayan hər bir xəstə kimi, onların da həyatı orqan ianəsindən asılıdır. Beyin ölümü baş vermiş bir şəxsin bağışlanan orqanları bir neçə insana yenidən yaşamaq şansı verə bilər.

Orqan ianəsi ilə bağlı verilən hər bir müsbət qərar bu uşaqlar üçün yarımçıq qalmış nağılların davamı, yarımçıq qalmış uşaqlığın bərpası deməkdir. Bəzən cəmi bir qərar bir ailənin acısını böyük bir möcüzəyə çevirə, onların qaranlıq dünyasına günəş kimi doğa bilər.

Orqan Donorluğu və Transplantasiyası üzrə Koordinasiya Mərkəzin məlumatı əsasında