Dəmir orqanizmdə oksigenin daşınmasını təmin edən hemoqlobinin əsas tərkib hissələrindən biridir. Bu barədə tanınmış rusiyalı endokrinoloq Zuxra Pavlova məlumat verib.

Azmedinfo.az "Gazeta" nəşrinə istinadən yazır ki, həkimin sözlərinə görə, dəmir iki formada olur: hem dəmiri (heyvan mənşəli qidalarda olur və daha yaxşı mənimsənilir) və qeyri-hem dəmiri (bitki mənşəli qidalarda olur və orqanizm tərəfindən daha zəif sorulur).

Hem dəmirinin əsas mənbələri

mal əti qaraciyəri və digər sakatatlar;
qırmızı ət;
ton balığı, skumbriya, sardina və digər balıqlar;
molyusklar;
hinduşkanın tünd əti.

Qeyri-hem dəmiri ilə zəngin qidalar 

ispanaq;
mərcimək və digər paxlalılar;
balqabaq tumu;
kinoa;
brokkoli;
tofu;
tərkibində ən azı 70 faiz kakao olan tünd şokolad.

Mütəxəssis qeyd edir ki, bitki mənşəli dəmirin mənimsənilməsini artırmaq üçün onu C vitamini ilə zəngin qidalarla birlikdə qəbul etmək tövsiyə olunur.

Gündəlik dəmir tələbatı

kişilər üçün təxminən 8 mq;
reproduktiv yaşda olan qadınlar üçün 18 mq;
hamilə qadınlarda isə bu ehtiyac daha yüksəkdir.

Həkim vurğulayır ki, sağlam orqanizm dəmirin sorulmasını özü tənzimləyir: ehtiyatlar az olduqda dəmir daha aktiv mənimsənilir, kifayət qədər olduqda isə sorulma azalır. Bununla belə, dəmir preparatları yalnız həkim məsləhəti və laborator müayinələrin nəticələrinə əsasən qəbul edilməlidir.