Ayaq biləyi, ayaq üstü və barmaqlardakı tük tökülməsi sadə bir kosmetik və ya fiziki dəyişiklik deyil. Həm müasir təbabətdə, həm də ənənəvi təbabət məktəblərində (Çin və Hind təbabəti kimi) bu hal bədənin aşağı ətraflarında qan dövranının zəifləməsi və damar daralmasının vacib bir xəbərdarlıq siqnalı hesab olunur.

Azmedinfo.az "American Endovascular" klinik şəbəkəsinin məlumatına görə, tük köklərinin canlılığını qoruması və inkişaf etməsi üçün mütəmadi olaraq qan, oksigen və qida maddələrinə ehtiyacı var.

Qan damarları piy və xolesterin çöküntüləri səbəbindən daraldıqda və ya tıxandıqda, bədənin ən kənar nöqtələri olan ayaqlara kifayət qədər qan çata bilmir. Qan axını azaldıqda isə orqanizm qanı daha həyati vacib organlara yönəldir. Nəticədə ayaqlardakı tük kökləri yetərincə bəslənə bilmir, fəaliyyətini dayandırır və tökülməyə başlayır.

Ayaqlarınızın zamanla və səbəbsiz yerə tüksüzləşdiyini müşahidə edirsinizsə, xüsusilə də bu hal ayaqlarda davamlı soyuqluq və ya yeriyərkən baldır ağrıları ilə müşayiət olunursa, vücudun bu xəbərdarlıq siqnalına laqeyd yanaşmayın. Bu simptomlar ürək-damar sağlamlığınızı yoxlatmaq üçün vaxt itirmədən həkimə müraciət etməyin vacibliyini göstərir.

Unutmayın ki, orqanizmimiz hər zaman bizimlə "danışır", sadəcə onun verdiyi siqnalları doğru oxumaq lazımdır.