Cəmiyyətdə ən çox qarışdırılan tibbi anlayışlardan biri qıcqırma ilə reflüks xəstəliyinin eyniləşdirilməsidir.

Azmedinfo.az xəbər verir ki, qastroenteroloq, hepatoloq və invaziv endoskopist Aqil Ağakişiyevin sözlərinə görə, bir çox insan qıcqırma hiss etdikdə bunun hökmən reflüks olduğunu düşünsə də, əslində qıcqırma müstəqil bir xəstəlik deyil, reflüksün əlamətlərindən biridir.

Həkim bildirir ki, qıcqırma döş qəfəsinin mərkəz nahiyəsində hiss edilən yanma hissidir, reflüks isə mədədə olan turşunun qida borusuna geri qayıtması prosesidir. Reflüks zamanı qıcqırmadan başqa ağıza turş və ya acı mayenin gəlməsi, boğazda yanma və ya qıcıqlanma hissi, səs tutulması və davamlı öskürək kimi əlamətlər də müşahidə oluna bilər.

Ekspert vurğulayır ki, əgər bu şikayətlər tez-tez təkrarlanırsa, onları normal qəbul etmək olmaz, səbəbini öyrənmək və düzgün müalicə almaq üçün vaxtında qastroenteroloqa müraciət edilməlidir.