Bu gün Azərbaycanda ürək-damar xəstəlikləri ilə mübarizə, ürək cərrahiyyəsi və invaziv kardiologiyanın inkişaf səviyyəsi artıq yalnız region ölkələri ilə deyil, dünyanın qabaqcıl tibb mərkəzləri ilə müqayisə oluna biləcək mərhələyə yüksəlib. 

Azmedinfo.az xəbər verir ki, ürək-damar cərrahı, millət vəkili Rəşad Mahmudovun sözlərinə görə, qazanılan uğurların təməlində xaricdə ixtisaslaşaraq vətənə qayıdan kadrların, ölkəmizdə formalaşmış təcrübəli mütəxəssislərin, eləcə də son 14–15 ildə rezidentura sistemində yetişən yeni nəsil həkimlərin böyük zəhməti dayanır.

Daha böyük nailiyyətlər üçün görüləsi işlərin hələ çox olduğunu vurğulayan cərrah əlavə edib: "Elm, təhsil, texnologiya və ən əsası, peşəkar həmrəylik bu inkişaf yolunun əsas dayaqlarıdır. Ən böyük məqsədimiz isə dəyişməz olaraq qalır: Azərbaycanda hər bir insan ən çətin anında öz ürəyini və canını tərəddüd etmədən Azərbaycan həkiminə etibar edə bilsin."