Nişasta əsaslı şəkərin orqanizmdə çox sürətlə mənimsənilməsi, qaraciyərdən başqa orqanda parçalanmaması, insulin müqavimətini artırması və xüsusilə toxluq hissini kifayət qədər təmin etməməsi nəticəsində sağlamlıq problemlərinə səbəb ola biləcəyi bildirilir. Bu problemlərin başında isə piylənmə və digər xroniki xəstəliklər gəlir.

Azmedinfo.az "Anadolu Ajansı"na istinadən yazır ki, Hacettepe Universiteti Tibb fakültəsinin Endokrinologiya və Metabolizm kafedrasının professoru Okan Bülent Yıldız nişasta əsaslı şəkərin orqanizmə təsirləri ilə bağlı xəbərdarlıq edib.

“Bu şəkərin həddindən artıq istehlakı onun orqanizmdə yalnız qaraciyər tərəfindən istifadə olunması səbəbindən qaraciyərin üzərinə əlavə yük salır. Bu isə qaraciyərin piylənməsinə, insulin müqavimətinin yaranmasına və orqanizmdə yağın normalda yığılmamalı olduğu nahiyələrdə toplanmasına gətirib çıxara bilər.”

Professorun sözlərinə görə, hamiləlik dövründə nişasta əsaslı şəkərdən istifadə həm anada piylənmə və metabolik xəstəliklər riskini artırır, həm də şəkərin dölə keçməsi nəticəsində körpənin çəkisinin normadan əhəmiyyətli dərəcədə yüksək olmasına səbəb ola bilər.

Bu vəziyyət doğuş zamanı həyati təhlükə yarada biləcək problemlərin və müxtəlif ağırlaşmaların inkişaf riskini də artırır.