Ürək cərrahiyyəsində tətbiq edilən müasir metodlar sayəsində əməliyyatdan sonra gündəlik həyata daha tez və rahat qayıtmaq mümkündür.

Azmedinfo.az xəbər verir ki, Respublika Diaqnostika Mərkəzində (RDM) ürək-damar cərrahı Natiq Mirzəyev tərəfindən icra olunan minimal invaziv ürək əməliyyatları pasiyentlərə ənənəvi cərrahiyyəyə nisbətən mühüm üstünlüklər təqdim edir. Bu üsul zamanı döş sümüyü tam qorunur, müdaxilə qabırğaarası nahiyədən açılan kiçik kəsik vasitəsilə icra edilir, nəticədə daha az qan itkisi və kəskin azalan əməliyyatsonrası ağrılar müşahidə olunur. Standart açıq əməliyyatlarda bərpa müddəti 6–8 həftə çəkdiyi halda, minimal invaziv yanaşma sayəsində xəstələr cəmi 2–3 həftə ərzində normal həyat ritminə qayıda bilirlər.

Sözügedən müasir cərrahi metod qulaqcıqlararası çəpər defektinin (ASD) bərpası, mitral və aortal qapaqların təmiri və ya protezləşdirilməsi, eləcə də koronar şuntlama (bypass) əməliyyatlarında uğurla tətbiq edilir.

Təqdim olunan videoda Natiq Mirzəyev gənc pasiyentdə anadangəlmə ürək qüsurunu döş sümüyünə toxunmadan, qabırğaarası təxminən 10–11 sm-lik kiçik kəsiklə uğurla təmir edir. Bununla yanaşı, əməliyyat metodunun hər bir pasiyent üçün uyğunluğu yalnız cərrah tərəfindən aparılan ətraflı klinik müayinələrdən sonra fərdi qaydada müəyyənləşdirilir.