Respublika Gigiyena və Epidemiologiya Mərkəzinin Radiasiya gigiyenası bölməsinin əməkdaşları illik fəaliyyət planı çərçivəsində Gədəbəy rayonuna ezam olunublar.

Azmedinfo.az xəbər verir ki, səfər “Nüvə və digər kütləvi qırğın silahlarının mümkün tətbiqi ilə əlaqədar yarana biləcək təhlükənin qarşısının alınması məqsədilə əhalinin mühafizəsi, habelə profilaktika və təhlükəsizlik tədbirlərinin həyata keçirilməsi üzrə Tədbirlər Planı”nın icrası məqsədilə təşkil edilib.

Tədbirlər çərçivəsində rayonun sərhədyanı kənd və qəsəbələrində radioloji monitorinq aparılıb, ərazilərdə xarici qamma-şüalanmanın ekspozisiya doza gücü ölçülüb. Eyni zamanda götürülən torpaq nümunələri toksikoloji və radioloji müayinələrin aparılması üçün Mərkəzin müvafiq laboratoriyalarına təqdim olunub.

Bu istiqamətdə monitorinq və laborator nəzarət tədbirləri müntəzəm olaraq davam etdirilir.