Yeni tədris ilinin başlanmasına az qalmış valideynlər məktəb forması, çanta, dəftərxana ləvazimatları və digər hazırlıqlara diqqət yetirirlər. Lakin məktəbə hazırlıq yalnız maddi ehtiyacların təmin olunması ilə məhdudlaşmır. Uşağın sağlamlıq vəziyyətinin qiymətləndirilməsi də yeni dərs ilinə hazırlığın mühüm hissələrindən biridir.

Azmedinfo.az xəbər verir ki, məktəb dövründə uşağın qarşısında artan fiziki və zehni yük, uzun müddət oturaq vəziyyətdə qalmaq, dərsə və yeni gündəlik rejimə uyğunlaşmaq kimi tələblər yaranır. Bu səbəbdən tədris ili başlamazdan əvvəl uşağın ümumi sağlamlıq vəziyyətinin qiymətləndirilməsi valideynlər üçün faydalı ola bilər.

Hansı müayinələrə diqqət yetirmək olar?

Məktəblilər üçün tibbi check-up zamanı uşağın yaşına, sağlamlıq vəziyyətinə və həkimin tövsiyələrinə uyğun olaraq müxtəlif müayinələr aparıla bilər.

Belə kompleks müayinələrə, məsələn:

pediatr müayinəsi – uşağın ümumi sağlamlıq vəziyyətinin qiymətləndirilməsi;
nevropatoloq müayinəsi – sinir sistemi və uşağın nevroloji vəziyyətinin dəyərləndirilməsi;
oftalmoloq müayinəsi – görmə qabiliyyətinin yoxlanılması;
LOR həkimi və audioloq müayinəsi – qulaq, burun və boğaz orqanlarının, eləcə də eşitmənin qiymətləndirilməsi;
nəcisin ümumi analizi və parazitoloji müayinə – həkim göstərişi olduqda bağırsaq parazitlərinin, o cümlədən helmint yumurtalarının aşkarlanması;
Lyambliya IgM analizi – müvafiq klinik göstəriş olduqda lyambliya infeksiyasının qiymətləndirilməsi

daxil edilə bilər.

Görmə və eşitmə məktəb uğuruna necə təsir edir?

Uşağın görmə və eşitmə qabiliyyəti onun dərsləri mənimsəməsində mühüm rol oynayır. Görmə ilə bağlı problemlər lövhədəki yazıları oxumağı və uzun müddət kitab-dəftərlə işləməyi çətinləşdirə bilər. Eşitmə problemləri isə müəllimin izahlarını və şifahi tapşırıqları qavramağa təsir göstərə bilər.

Buna görə də valideynlərin uşağın görmə və eşitməsində hər hansı dəyişiklik hiss etməsi halında mütəxəssis müayinəsini gecikdirməməsi vacibdir.

Uşaqda hansı əlamətlərə diqqət etmək lazımdır?

Valideynlər xüsusilə uşağın tez yorulması, tez-tez baş və ya qarın ağrısından şikayət etməsi, görmədə çətinlik, eşitmənin zəifləməsi, yuxu problemləri, diqqətin azalması və ya məktəbə getmək istəməməsi kimi əlamətlərə diqqət yetirməlidirlər.

Bu əlamətlərin hər biri mütləq xəstəlik anlamına gəlmir. Lakin davamlı və təkrarlanan şikayətlər olduqda onların səbəbini müəyyənləşdirmək üçün pediatrla məsləhətləşmək məqsədəuyğundur.

Check-up nə üçün vacibdir?

Məktəbəqədər və məktəb yaşında profilaktik müayinələrin əsas məqsədi uşağın sağlamlıq vəziyyəti barədə ümumi təsəvvür yaratmaq, mövcud problemləri vaxtında aşkar etmək və zərurət yarandıqda müvafiq mütəxəssisə yönləndirməkdir.

Bununla yanaşı, bütün uşaqlar üçün eyni analiz və müayinələrin mütləq şəkildə aparılması tələb olunmur. Laborator və instrumental müayinələrin zəruriliyi uşağın yaşından, şikayətlərindən, anamnezindən və həkimin klinik qiymətləndirməsindən asılıdır.

Yeni tədris ilinə hazırlıq zamanı uşağın sağlamlığına diqqət yetirmək onun məktəb həyatına daha rahat başlamasına və mövcud problemlərin vaxtında müəyyənləşdirilməsinə kömək edə bilər.