Payız fəslinin gəlişi, havaların soyuması və məktəbəqədər təhsil müəssisələrində yeni tədris ilinin start götürməsi uşaqlar arasında tənəffüs yolu infeksiyalarının artmasına zəmin yaradır. Kollektiv və qapalı məkanlarda sıx təmasın çoxalması xəstəliklərin sürətlə yayılma ehtimalını gücləndirir.

Azmedinfo.az xəbər verir ki, Səhiyyə Nazirliyi Respublika Gigiyena və Epidemiologiya Mərkəzinin (RGEM) məlumata əsasən, bu mənzərə mövsüm üçün təbii hesab edilir və zəruri profilaktik tədbirlərlə xəstələnmə göstəricilərini minimuma endirmək mümkündür.

Qurum mütəxəssisləri valideynləri xüsusilə diqqətli olmağa səsləyir:

Uşaqların təqvimə uyğun peyvəndlənməsi vaxtında təmin edilməlidir;

Balacaların rasionunda balanslı qidalanmaya, gündəlik yuxu rejiminə və fərdi təmizlik vərdişlərinə xüsusi yer verilməlidir;

Əgər uşaqda halsızlıq, bədən hərarətinin yüksəlməsi, öskürək, dəridə səpgi, mədə-bağırsaq pozğunluğu (qusma və ya ishal) kimi simptomlar aşkarlanarsa, o, digər uşaqları yoluxdurmamaq üçün tam sağalanadək bağçaya göndərilməməli, ehtiyac yarandıqda isə dərhal sahə həkiminə müraciət edilməlidir.

Eyni zamanda bağça rəhbərliyi və işçi heyəti üçün də tələblər xatırladılıb. Məktəbəqədər müəssisələrdə otaqların qrafik üzrə havalandırılması, dezinfeksiya və təmizlik işlərinin gücləndirilməsi, həmçinin səhər qəbulu zamanı xəstəlik əlamətləri daşıyan uşaqların erkən aşkarlanaraq təcrid olunması infeksiyaların yayılma zəncirini qırmağın ən təsirli yoludur.