Gündəlik rasionda zülalın (proteinin) rolu təkcə bədən quruluşunu formalaşdırmaqla və idman göstəriciləri ilə məhdudlaşmır.

Azmedinfo.az xəbər verir ki, həkim-endokrinoloq Fərhad Burzunun sözlərinə görə, orqanizmin əsas tikinti materialı olan zülal toxluq hormonlarını aktivləşdirir, əzələ kütləsini qoruyur və maddələr mübadiləsinin balanslı işləməsini təmin edir.

Mütəxəssis bildirir ki, protein balansını qorumaq üçün vərdişləri kökündən dəyişməyə və ya kəskin pəhrizlərə ehtiyac yoxdur. Bunun üçün ilk növbədə günün hər əsas yemək payına mütləq bir zülal mənbəyi daxil edilməlidir. Səhər, nahar və axşam süfrəsində yumurta, toyuq, balıq, qırmızı ət, mərcimək, lobya və ya süd məhsullarının yer alması bədənin zülalla bərabər təminatını asanlaşdırır.

Eyni zamanda, günorta və axşamüstü qəlyanaltılarını da funksional seçmək olduqca əhəmiyyətlidir. Boş karbohidratlar əvəzinə qatıq, kefir, soyutma yumurta və ya bir ovuc çərəz kimi qidalar ani aclıq hissinin dərhal qarşısını alır. Bu prosesi vərdişə çevirmək üçün qidaları qabaqcadan hazırlamaq, yəni bişmiş əti, yumurtanı və ya paxlalıları soyuducuda əlçatan saxlamaq tələsik zamanı qeyri-sağlam seçimlərin önünü kəsir.

Kiçik addımlarla başlamaq, sadəcə hər yeməyə əlavə bir protein komponenti qatmaq belə maddələr mübadiləsində nəzərəçarpan fərq yaradır. Protein tozlarından isə zərurət yarandıqda, məsələn, smuzilərə qatılaraq istifadə oluna bilər, lakin bu zaman ümumi kalori yükü mütləq nəzərə alınmalıdır. Həkim-endokrinoloqun qənaətinə görə, əsas hədəf pəhrizi tamamilə alt-üst etmək deyil, qəbul olunan zülal miqdarını gün ərzində düzgün və balanslı şəkildə bölüşdürməkdir.