Tip 1 diabeti olan şəxslərin təxminən 30 faizində xroniki böyrək xəstəliyi (XBH) inkişaf edir.

Azmedinfo.az xəbər verir ki, həkim-endokrinoloq Fərhad Burzunun sözlərinə görə, bu vəziyyət böyrək çatışmazlığı və ürək-damar ağırlaşmaları riskini əhəmiyyətli dərəcədə artırır.

"ABŞ Qida və Dərman Administrasiyası (FDA) tip 1 diabetlə əlaqəli XBH olan şəxslər üçün finerenon preparatını təsdiqləyib. Bu, həmin xəstə qrupu üçün 30 ildən artıq müddətdə təsdiqlənən ilk yeni müalicə seçimidir",- deyə həkim qeyd edib.

Ekspert vurğulayıb ki, müalicənin təsdiqi FINE-ONE III faza tədqiqatının nəticələrinə əsaslanıb. Finerenon standart müalicəyə əlavə edildikdə sidikdə albumin/kreatinin nisbətini (UACR) 3 ayda 22 faiz, 6 ayda isə 28 faiz azaldıb.

Həkim onu da bildirib ki, preparatın ən çox bildirilən yan təsirləri hiperkalemiya (qanda kaliumun yüksəlməsi), hipotenziya (qan təzyiqinin aşağı düşməsi) və hiponatremiyadır (qanda natrium səviyyəsinin azalması).