Münhendə təqdim olunan miyokard infarktının beşinci universal tərifi ilə infarktın diaqnostikası və yaranma səbəblərinin müəyyənləşdirilməsinə daha fərqli yanaşma formalaşıb. Artıq əsas sual yalnız “İnfarkt varmı?” deyil, “İnfarkt niyə yaranıb?” sualıdır.

Azmedinfo.az xəbər verir ki, bu fikirləri Səhiyyə Nazirliyinin Elmi-Tədqiqat Kardiologiya İnstitutunun direktoru, professor Gülnaz Dadaşova bildirib.

İnfarktın əsas səbəblərindən biri koronar damarlarda aterosklerotik zədələnmə və trombun yaranmasıdır. İkinci səbəb ürək əzələsinin oksigenə olan tələbatı ilə onun oksigenlə təchizatı arasındakı uyğunsuzluqdur. Üçüncü səbəb isə müxtəlif tibbi prosedurlar nəticəsində yaranan infarktlardır.

Bu səbəbdən infarktın müalicəsinə başlamazdan əvvəl onun yaranma mexanizminin və səbəbinin müəyyənləşdirilməsi xüsusi əhəmiyyət daşıyır. İnfarkt diaqnozu yalnız troponin səviyyəsinin yüksəlməsi əsasında qoyulmamalıdır. Elektrokardioqramma, troponinin dinamikası, xəstənin klinik vəziyyəti və görüntüləmə nəticələri kompleks şəkildə qiymətləndirilməlidir.

İnfarktın səbəbi dəqiq müəyyənləşdirildikdə müalicə daha düzgün, fərdiləşdirilmiş və məqsədyönlü şəkildə aparıla bilər. Buna görə də infarktın səbəbini aydınlaşdırmaq müasir kardiologiyada əsas vəzifələrdən biridir.

Kardiologiya dəyişir. Biz də bu dəyişiklikləri öyrənir, seçir və praktikada tətbiq edirik.