Quduzluq insan və heyvanlar üçün ciddi təhlükə törədən, virus mənşəli və ölümcül nəticələrə səbəb ola bilən yoluxucu xəstəliklərdən biridir. Ümumdünya Heyvan Sağlamlığı Təşkilatının təşəbbüsü ilə hər il sentyabrın 28-i Ümumdünya Quduzluqla Mübarizə Günü kimi qeyd olunur. Bu günün əsas məqsədi xəstəlik barədə maarifləndirməni artırmaq, quduzluğun qarşısının alınmasının vacibliyinə diqqət çəkməkdir.

Azmedinfo.az ekspertlərin fikirlərinə istinadən yazır ki, quduzluq əsasən yoluxmuş heyvanın dişləməsi və ya cızması, eləcə də tüpürcəyinin zədələnmiş dəri və selikli qişa ilə təması nəticəsində insana keçə bilər. Xüsusilə sahibsiz və peyvənd statusu məlum olmayan it və pişiklərlə təmas zamanı ehtiyatlı olmaq lazımdır. Ev heyvanlarının quduzluğa qarşı vaxtında peyvənd etdirilməsi xəstəliyin yayılmasının qarşısının alınmasında mühüm rol oynayır.

Heyvan tərəfindən dişlənmə və ya cızılma baş verdikdə yaranı dərhal bol su və sabunla, mümkün qədər uzun müddət, yaxşı yumaq və gecikmədən tibb müəssisəsinə müraciət etmək lazımdır. Yaranın kiçik olması və ya heyvanın sağlam görünməsi tibbi yardımdan imtina üçün əsas olmamalıdır. Quduzluğa qarşı profilaktik müalicənin başlanması barədə qərarı həkim verməlidir və təyin olunan peyvəndlər vaxtında qəbul edilməlidir.

Quduzluğun klinik əlamətləri meydana çıxdıqdan sonra xəstəliyin müalicəsi son dərəcə çətinləşir və əksər hallarda ölümcül nəticələnir. Buna görə də xəstəlikdə ən mühüm məqam yoluxmanın qarşısını almaq və mümkün təmasdan sonra vaxtında tibbi yardım almaqdır.

Uşaqlara da heyvanlarla təhlükəsiz davranış qaydaları izah edilməli, sahibsiz və tanımadıqları heyvanlara yaxınlaşmamaq, onları sığallamamaq və yemləməmək öyrədilməlidir. Həmçinin heyvanların davranışında qeyri-adi dəyişiklik, səbəbsiz aqressivlik, həddindən artıq tüpürcək ifrazı və ya koordinasiya pozuntusu müşahidə edildikdə onlara yaxınlaşmaq olmaz.

Quduzluqla mübarizədə insan və heyvan sağlamlığının qorunması bir-biri ilə sıx bağlıdır. Ev heyvanlarının mütəmadi baytarlıq nəzarətində saxlanılması, peyvəndlərinin vaxtında aparılması və riskli təmas zamanı tibbi yardıma gecikmədən müraciət edilməsi xəstəliyin qarşısının alınmasının əsas şərtlərindəndir.