29 sentyabr dünyada ürək-damar xəstəlikləri ilə bağlı maarifləndirmənin artırılması və ürək sağlamlığının qorunmasına diqqətin yönəldilməsi məqsədilə Ümumdünya Ürək Günü kimi qeyd olunur.

Azmedinfo.az xəbər verir ki, Dünya Ürək Federasiyasının təşəbbüsü ilə 2000-ci ildən keçirilən bu günün əsas məqsədi insanları ürək-damar xəstəliklərinin risk faktorları, onların qarşısının alınması və sağlam həyat tərzinin əhəmiyyəti barədə məlumatlandırmaqdır.

Ürək-damar xəstəliklərinin yaranma riskini azaltmaq üçün gündəlik həyat tərzinə diqqət yetirmək vacibdir. Səhiyyə Nazirliyinin İctimai Səhiyyə və İslahatlar Mərkəzi tərəfindən də əhali arasında bu istiqamətdə maarifləndirmə aparılır və ürək sağlamlığının qorunması üçün bir sıra tövsiyələr verilir. Zərərli vərdişlərdən, xüsusilə tütün istifadəsindən uzaq durmaq, duz və şəkərin həddindən artıq qəbulunu məhdudlaşdırmaq, tərəvəz və meyvələrlə zəngin, balanslı qidalanmaq ürək-damar sisteminə müsbət təsir göstərir.

Müntəzəm fiziki aktivlik də ürəyin sağlamlığının qorunmasında mühüm rol oynayır. Gündəlik gəzinti, idman və digər uyğun fiziki fəaliyyətlər qan dövranının yaxşılaşmasına, bədən çəkisinin və qan təzyiqinin nəzarətdə saxlanmasına kömək edir. Bununla yanaşı, kifayət qədər və keyfiyyətli yuxu, stressin idarə olunması və mütəmadi tibbi müayinələr ürək-damar xəstəliklərinin risklərinin vaxtında müəyyənləşdirilməsi baxımından əhəmiyyətlidir.

Ürək sağlamlığının qorunması yalnız müəyyən bir gündə deyil, həyatın hər mərhələsində diqqətdə saxlanılmalı olan məsələdir. Sağlam qidalanma, hərəkətli həyat tərzi və zərərli vərdişlərdən uzaq durmaq ürəyin uzunmüddətli sağlamlığına mühüm töhfə verir.