Osteoporoz – sümük toxumasının sıxlığının azalması, strukturunun zəifləməsi və nəticədə sümüklərin kövrəkləşərək asanlıqla qırılmasına gətirib çıxaran xroniki və ciddi bir xəstəlikdir. Əksər hallarda heç bir ilkin əlamət göstərmədən inkişaf etdiyi üçün təbabətdə "səssiz xəstəlik" kimi də tanınır.

Azmedinfo.az mütəxəssislərin rəyinə əsaslanaraq yazır ki, sümük kütləsi yaş ötdükcə təbii olaraq azalmağa meyillidir. Lakin gündəlik həyatımızda tətbiq edəcəyimiz sadə və effektiv vərdişlərlə sümüklərin möhkəmliyini uzun illər boyu qorumaq mümkündür:

Balanslaşdırılmış və zəngin qidalanma: Kalsium və D vitamini ilə zəngin qidaların (süd və süd məhsulları, yaşıl yarpaqlı tərəvəzlər, balıq və s.) rasiona daxil edilməsi sümük toxumasının bərpası üçün vacibdir.

Fiziki aktivlik və idman: Müntəzəm yürüşlər, gəzinti və sümük-əzələ sistemini gücləndirən idman təmrinləri sümük sıxlığının saxlanmasına birbaşa təsir edir.

Profilaktik müayinələr: Xüsusilə risk qrupunda olan şəxslərin (yaşlılar, menopoz dövründə olan qadınlar və sümük qırılmaları yaşayanlar) vaxtaşırı sümük sıxlığı müayinəsindən (densitometriya) keçmələri xəstəliyin erkən diaqnostikası üçün hayati əhəmiyyət daşıyır.

Güclü sümüklər aktiv və keyfiyyətli həyatın təməlidir. Sağlamlığınızın qeydinə bu gündən qalın!