İkinci şans: Ümidin və əzmin toxunduğu əllər

05 Mart 2025

564

2002-ci ildə, 55 yaşında olarkən, Riçard Manjino böyrək daşı problemi ilə qarşılaşdı. Lakin bu xəstəlik daha ciddi bir fəsadla nəticələndi: o, qan infeksiyası olan sepsislə xəstələndi.

Azmedinfo.az bununla bağlı məlumata istinadən yazır ki, həkimlər musiqiçi üçün ağır, lakin qaçılmaz bir qərar verdilər: dördqat amputasiya.

Amputasiyadan sonra o, tez bir zamanda protez ayaq və qollarla yaşamağa uyğunlaşdı. Əvvəlcə eynəyini taxmağı, sonra avtomobil sürməyi, hətta rəsm çəkməyi öyrəndi.

Amma illər keçdikcə daha çox şeyə nail olmağı arzulayırdı. Ən böyük arzusu isə iki nəvəsinin əlindən tutmaq idi.

2011- ci ildə o, qolların transplantasiya edilə biləcəyi haqqında eşitdi və bu onda böyük ümid oyatdı. Həkimlərlə görüş zamanı Manjinoya bildirildi ki, bu eksperimental əməliyyat üçün artıq çox yaşlıdır. Lakin onun əzmkarlığı xəstəxana rəhbərliyinin qərarını dəyişdi – o, yeni əllərə sahib olacaqdı.

"Həyat yoldaşım və mən ağladıq – hamı ağlayırdı," Manjino müsahibəsində belə xatırlayır. "Biz bilirdik ki, bu, bizim şansımızdır."

Meyit donordan alınan iki qolun transplantasiyası 12 saat çəkdi. Dörd cərrah komandası eyni vaxtda işləyirdi. Əməliyyatda ümumilikdə 40 nəfər iştirak edirdi, onlardan 14-ü cərrah idi.

Əməliyyat komandası, qan axınının Manjinonun yeni əlinə çatdığını gördükləri anı "tarixi məqam" adlandırıb. Bu, onun orqanizminin transplantasiyanı dərhal qəbul etdiyini göstərirdi.

Əməliyyatdan sonra Manjino yenidən pianoda ifa etməyə başladı və çoxdan arzuladığı bir şeyi etdi – nəvələrinin əlindən tutdu.

Bir gün gitarada da ifa edə biləcəyinə ümid edən Manjino barmaqlarındakı hissiyyatın getdikcə artdığını söyləyib. "Amma hələlik mən pianonun verdiyi xoşbəxtlikdən tam razıyam," deyə əlavə edib.

Orqan Donorluğu və Transplantasiyası üzrə Koordinasiya Mərkəzi