Hər il qlobal cəmiyyət mart ayının ikinci cümə axşamı gününü Ümumdünya Böyrək Günü kimi qeyd edir.

Azmedinfo.az xəbər verir ki, Beynəlxalq Nefroloqlar Cəmiyyəti və Beynəlxalq Böyrəklər Fondu Federasiyasının birgə səyləri nəticəsində təsis edilən Ümumdünya Böyrək Günü özündə böyrəyin əhəmiyyəti haqqında qlobal informasiya və maarifçilik kampaniyasını ehtiva edir.

Ümumdünya Səhiyyə Təşkilatının, eləcə də beynəlxalq nefroloji təşkilatların məlumatlarında bu gün böyrək xəstəliyi olan insanların sayı dünya əhalisinin təxminən 10%-ni təşkil etdiyi əks olunur. Və bu rəqəm, təəssüf ki, çox sürətlə artır.

Xroniki böyrək xəstəliyi bütün dünyada epidemiyaya çevrilmiş böyük ictimai sağlamlıq problemidir. O, erkən aşkar edilərsə, qarşısını almaq mümkündür. Xəstəlik haqqında məlumatlılığın olmaması onu erkən mərhələdə aşkarlamağa imkan vermir. İnsanlar öz xəstəliklərindən xəbərsiz olduqları üçün böyrək çatışmazlığı inkişaf edir və onların həyat keyfiyyəti pisləşir.

Dünyanın müxtəlif yerlərində aparılan araşdırmalar göstərib ki, xəstəlik haqqında məlumatlılıq 10 faizdən aşağıdır. Bu səbəbdən xəstəlik son mərhələdə böyrək çatışmazlığı mərhələsinə keçir, həmçinin əlilliyə və ölüm nisbətlərinin artmasına səbəb olur.

Mütəxəssislər böyrəklərin sağlamlığına mənfi təsir göstərən amillər kimi bunları göstərirlər: siqaret, alkoqol və narkotik istifadəsi; uzunmüddətli, xüsusilə nəzarətsiz, müəyyən dərmanların istifadəsi; içməli sudan az istifadə olunması, tez-tez onu şirələr, qazlı və tonik içkilərlə əvəz etmək; oturaq həyat tərzi; həddindən artıq duz istehlakı və qeyri-sağlam pəhrizlər də daxil olmaqla pis qidalanma; xroniki qeyri-infeksion və yoluxucu xəstəliklər və s.

Ümumdünya Böyrək Günü çərçivəsində elmi-praktik konfranslar təşkil olunur, xəstəliyin profilaktikası, ictimaiyyətin maarifləndirilməsi istiqamətində müzakirələr aparılır. Keçirilən tədbirlərin məqsədi ictimai səhiyyə sahəsində çalışan mütəxəssislərin və ictimaiyyətin diqqətini geniş yayılmış xroniki böyrək çatışmazlığı, böyrək xəstəliyinin aşkarlanmasına və müalicə üsullarına yönəltməkdir.