Donorluq hekayəsi: Aleksandra Qmurçikin insanlıq dərsi

09 Aprel 2025

486

ABŞ-da 90 mindən çox insan donor böyrək gözləyir. Bu statistika hər il yüzlərlə insanın həyatını risk altına salır. Çikaqoda fəaliyyət göstərən nefroloq Aleksandra Qmurçik isə iki il əvvəl qeyri-adi bir addım ataraq tanımadığı qadına – Cincerə böyrəyini bağışlayıb və onun həyatını xilas edib.

Azmedinfo.az həkim Aleksandra Qmurçikin donorluq hekayəsini təqdim edir:

Bu hadisə təkcə bir insanın həyatını xilas etməklə kifayətlənməyib, həm də "çarpaz donorluq" adlı xüsusi bir prosesin başlanmasına səbəb olub. Belə ki, Cincerin həyat yoldaşı Geri tibbi səbəblərə görə ona donor ola bilmirdi. Lakin o, başqa bir xəstəyə böyrəyini bağışlamağa qərar verib. Gerinin bu addımının şahidi olan həkim Qmurçik də Cincerə donor olmaq istədiyini bildirib.

Humanist və maarifləndirici məqsədlə donor olan Aleksandra Qmurçik bu yolla transplantasiyaya şübhə ilə yanaşan insanlara şəxsi nümunə göstərmək istəyib: “Mən deyə bilərəm ki, özüm böyrəyimi bağışlamışam və tibbi sistemə bu qədər güvənirəm”.

Aleksandra Qmurçik həkim kimi tez-tez böyrək çatışmazlığından əziyyət çəkən pasiyentlərlə qarşılaşır. Bu pasiyentlər həftədə üç dəfə, hər biri təxminən dörd saat davam edən dializ proseduruna məcbur qalırlar. Həkimin sözlərinə görə, bu proses fiziki və psixoloji cəhətdən xəstələri olduqca yorur, onların çoxu sosial dəstəkdən məhrum olur və özlərini təcrid olunmuş hiss edirlər. Məhz bu səbəbdən Qmurçik şəxsi nümunə göstərərək donorluğun əhəmiyyətinə diqqət çəkmək istəyib.

Əməliyyatdan sonra Aleksandra Qmurçik cəmi bir gecə xəstəxanada qalıb. İki həftəlik məzuniyyətdən sonra isə işinə qayıdıb. O qeyd edir ki, artıq onun bir pasiyenti də transplantasiyaya daha müsbət yanaşmağa başlayıb və bu prosesi dəyərləndirməyə qərar verib.