Çox vaxt toyuq ətinin istehlakı nəticəsində yaranan qida zəhərlənməsi Salmonella bakteriyasının törətdiyi infeksiyalar nəticəsində olur. Tibbi mikrobiologiya mütəxəssisi Dr. Özge Ünlü Salmonella bakteriyasının az bişmiş toyuq ətinin istehlakı nəticəsində yaranan epidemiyalara səbəb olduğunu bildirib.

Azmedinfo.az T24"ə istinadən yazır ki, infeksiyaların qarşısını almaq üçün alına biləcək tədbirlərə diqqət çəkən Ünlü, xüsusilə toyuq və ətin yaxşı bişirilməsi lazım olduğunu qeyd edib.

Professor bildirib ki, yeməklərə toxunmadan əvvəl əllər ən az 20 saniyə sabunlu su ilə yuyulmalı və yeməklər istehlakdan əvvəl yaxşıca bişirilməlidir. Çiy meyvə və tərəvəzlər yaxşıca yuyulduqdan sonra istehlak edilməlidir.

Salmonella həm insanlarda, həm də heyvanlarda infeksiyaya səbəb ola bilən bir bakteriyadır. Həkim xəbərdarlıq edib ki, Salmonella bakteriyası insanlara çox vaxt xəstə insanlar və ya heyvanlarla təmasda və ya onların nəcisləri ilə çirklənmiş su və ya qida qəbulu ilə keçir. Qida zəhərlənməsi vasitəsi olaraq tez-tez rast gəlinən Salmonella, tif və paratif kimi sistem infeksiyalarına da səbəb ola bilər.

Simptomlar ilk 8-72 saat ərzində görünür

65 yaşdan yuxarı, 5 yaşdan aşağı, xəstəlikləri olan və ya immun sistemi zəifləyən şəxslər üçün sadə qida zəhərlənməsinin belə ciddi nəticələrə səbəb ola biləcəyi bildirilir. Ona görə də qarın ağrısı, ürəkbulanma, qusma, ishal və bəzən qızdırma kimi əlamətlər ortaya çıxan bir insan qida qəbul etdikdən sonra ilk 8-72 saat ərzində bu simptomları görməməzliyə vurmamalıdır. Ən yaxın səhiyyə müəssisəsinə müraciət etməlidir.