Azərbaycanda Maqnit Rezonans Tomoqrafiyası (MRT) və Kompüter Tomoqrafiyası (KT) müayinələri üçün yeni ödəmə qaydasının tətbiqinə başlanılıb.

Azmedinfo.az-a verilən məlumata görə, dəyişiklik icbari tibbi sığorta çərçivəsində göstərilən xidmətlərə şamil olunur və ambulator şəraitdə aparılan MRT və KT müayinələrini əhatə edir.

Yeni qaydaya əsasən, sığortaolunan şəxslər bu müayinələri yalnız ixtisaslı həkimin göndərişi əsasında aldıqları halda Xidmətlər Zərfi çərçivəsində təqdim olunan tarifin 20 faizi həcmində müştərək maliyyələşmə məbləği ödəyəcəklər. Yəni, bu xidmətin ümumi dəyərinin müəyyən hissəsi vətəndaş tərəfindən qarşılanacaq, qalan hissəsi isə dövlət tərəfindən ödəniləcək.

Bu dəyişiklik tibbi xidmətlərin daha səmərəli təşkili, ehtiyacı olmayan hallarda aparılan bahalı müayinələrin qarşısının alınması və vətəndaşların tibbi məsuliyyətinin artırılması məqsədilə həyata keçirilir.

Tibbi Ərazi Bölmələrini İdarəetmə Birliyi (TƏBİB) və İcbari Tibbi Sığorta üzrə Dövlət Agentliyi bildirir ki, bu qərar vətəndaşların tibbi xidmətlərə əlçatanlığını məhdudlaşdırmır, əksinə xidmətin keyfiyyətli və hədəfli istifadəsini təşviq edir.