2-3 may tarixlərində Özbəkistanın Daşkənd şəhərində Şanxay Əməkdaşlıq Təşkilatının II Tibb Konqresi və Özbəkistan Kardioloqlarının Respublika Konfransı keçirilib.

Azmedinfo.az xəbər verir ki, tədbirdə Azərbaycanı Səhiyyə Nazirliyinin Elmi-Tədqiqat Kardiologiya İnstitutunun direktoru, professor Gülnaz Dadaşova və institutun elmi işçisi, tibb üzrə fəlsəfə doktoru Vüsal Hacıyev təmsil ediblər.

Konqres çərçivəsində azərbaycanlı alimlər çıxış edərək ölkəmizdə səhiyyə sistemində həyata keçirilən islahatlar, tibbi təhsilin inkişafı və Elmi-Tədqiqat Kardiologiya İnstitutunun fəaliyyəti barədə məlumat veriblər. Çıxışlarda müasir tibbi müalicə üsullarının araşdırılması və kardiologiya sahəsində elmi inkişafın əhəmiyyəti xüsusi vurğulanıb.

Tədbir zamanı Azərbaycan və Özbəkistan arasında kardiologiya sahəsində əməkdaşlığa dair memorandumun imzalanması da baş tutub.

Həmçinin, İcbari Tibbi Sığorta sisteminin ölkəmizdə tətbiqi və onun tibbi-sosial təsirləri barədə də iştirakçılara ətraflı məlumat verilib.

Azərbaycan nümayəndə heyəti qeyd edib ki, ölkədə TAVİ (transkateter aortal klap implantasiyası) əməliyyatları uğurla icra olunur və bu sahədə aparıcı mütəxəssislər tərəfindən davamlı olaraq təlim və kurslar təşkil edilir.

Konqresdə çıxış edənlər Şanxay Əməkdaşlıq Təşkilatına üzv ölkələr arasında tibbi sahədə əməkdaşlığın və təcrübə mübadiləsinin regionda səhiyyənin inkişafına mühüm töhfə verəcəyini vurğulayıblar.