Günəşdə baş verən fəallıq nəticəsində Yer kürəsində orta güclü maqnit qasırğası qeydə alınıb. Bu barədə “Fobos” hava mərkəzinin mütəxəssisi “Telegram” kanalında məlumat verib.

Azmedinfo.az xəbər verir ki, məlumata görə, maqnit qasırğasına səbəb Günəşin səthindəki tac dəliklərindən birindən çıxan sürətli günəş küləyidir. Bu axın planetlərarası maqnit sahəsinin konfiqurasiyasını dəyişərək, Bakı vaxtı ilə 17 may saat 01:00-dan etibarən Yerin maqnitosferində pozuntulara səbəb olub.

Saat 03:00-dan sonra bu pozuntular güclənərək G2 sinfinə daxil olan orta səviyyəli maqnit qasırğası şəklini alıb. Mütəxəssis bildirib ki, Yer kürəsi 19 may da daxil olmaqla sürətli və sıx günəş küləyi axını altında qalacaq. Bu səbəbdən 17 maydan etibarən bir neçə gün ərzində maqnit sahəsində dalğalanmalar və zəif maqnit qasırğaları müşahidə olunacaq.

Qeyd edək ki, maqnit qasırğaları bəzi insanlarda narahatlıq, yuxusuzluq və baş ağrısı kimi təsirlərə səbəb ola bilər. Həkimlər bu günlərdə sağlamlığa daha çox diqqət etməyi tövsiyə edirlər.