Bu gün Azərbaycan səhiyyəsinin və tibbi elminin inkişafında silinməz izlər buraxmış, görkəmli uroloq-alim, pedaqoq, dövlət mükafatları laureatı, Əməkdar elm xadimi, tibb elmləri doktoru, professor, Azərbaycan Milli Elmlər Akademiyasının həqiqi üzvü Mirməmməd Cavadzadənin anım günüdür.

Azmedinfo.az xəbər verir ki, səhiyyə ictimaiyyəti görkəmli akademik Mirməmməd Cavadzadənin xatirəsini dərin hörmət və ehtiramla anır.

Akademik Mirməmməd Cavadzadə yalnız Azərbaycan deyil, bütövlükdə SSRİ məkanında ilk ən güclü uroloji məktəbin banisi kimi tanınır. Onun təşəbbüsü ilə 1966-cı ildə əsası qoyulmuş və hazırda öz adını daşıyan Respublika Uroloji Xəstəxanası ölkədə urologiya sahəsində ixtisaslaşmış ilk müstəqil tibbi mərkəz olmuşdur. Bu gün də onun müəyyənləşdirdiyi elmi və praktik istiqamətlər həmin klinikada böyük məsuliyyətlə yaşadılır və inkişaf etdirilir.

Akademikin yaratdığı uroloji məktəb Azərbaycan səhiyyəsində elmi-pedaqoji ənənələrin mühüm dayağı olmuş, onun yetirmələri bu gün yalnız Azərbaycanda deyil, regionun müxtəlif ölkələrində uroloji xidmətin aparıcı simaları kimi fəaliyyət göstərməkdədir.

Mərhum alimin əziz xatirəsi bu gün Respublika Uroloji Xəstəxanasının rəhbərliyi və kollektivi tərəfindən Fəxri Xiyabanda ehtiramla yad edilib, məzarı üzərinə tər çiçəklər düzülüb.

Onun nurlu adı və zəngin elmi irsi daim minnətdarlıqla xatırlanacaq.