Səhiyyə Nazirliyinin Elmi-Tədqiqat Kardiologiya İnstitutunun təşəbbüsü ilə həyata keçirilən sosial məsuliyyət layihəsi çərçivəsində, institutun kollektivi Azərbaycan Uşaqlar İctimai Birliyinin nəzdində fəaliyyət göstərən Uşaq Sığınacağı-Reinteqrasiya Mərkəzinin balaca sakinləri ilə mənalı bir görüş keçirib.

Azmedinfo.az xəbər verir ki, insanlara yalnız sağlamlıq deyil, qayğı və ümid bəxş etməyi özünə missiya seçmiş institut kollektivi, bu həssas və qayğıya ehtiyacı olan uşaqlarla görüş zamanı onların gündəlik həyatı, təhsili, psixososial ehtiyacları və gələcək arzuları ilə maraqlanıb. Qəlbləri isidən söhbətlər, səmimi gülüşlər və birgə oyunlar tədbirin ən yaddaqalan anları olub.

Qurum nümayəndələri bildiriblər ki, uşaqların yalnız fiziki deyil, emosional və sosial rifahı da onların diqqət mərkəzindədir. Kollektiv mütəmadi olaraq bu mərkəzin balaca sakinlərinin təhsili, asudə vaxtlarının səmərəli təşkili və müxtəlif sosial layihələrdə iştirakı ilə yaxından maraqlanır.

“Bu uşaqlar bizim üçün yalnız cəmiyyətin himayəyə ehtiyacı olan üzvləri deyil, ailəmizin bir parçasıdır. Onlarla keçirdiyimiz hər görüş bizə insan olmağın əsl mənasını bir daha xatırladır,” – deyə institut əməkdaşları vurğulayıblar.

Tədbirin sonunda uşaqlara balaca hədiyyələr təqdim olunub, qarşılıqlı sevgi və ehtiram hissi isə bu görüşün ən qiymətli anısı kimi yadda qalıb.