Ölkəmizdə icbari tibbi sığortanın tətbiqi ilə səhiyyə xidmətlərinin əhatə dairəsi genişlənməkdə davam edir.

Azmedinfo.az xəbər veri ki, bu çərçivədə ilk dəfə olaraq TƏBİB-in tabeliyində olan tibb müəssisəsində — Gəncə Şəhər Birləşmiş Xəstəxanasının nəzdində fəaliyyət göstərən Akademik Zülfüqar Məmmədov adına xəstəxananın Oftalmologiya şöbəsində Paul qlaukoma implantasiyası əməliyyatı uğurla həyata keçirilib.

Əməliyyat müasir tibbi protokollara uyğun şəkildə və yüksək ixtisaslı oftalmoloqların iştirakı ilə aparılıb. Paul implantı qlaukomanın müalicəsində innovativ və effektiv yanaşma hesab olunur. Bu əməliyyat, göz içi təzyiqini normallaşdırmaqla, görmə funksiyasının qorunmasında mühüm rol oynayır və xəstələrin həyat keyfiyyətini əhəmiyyətli dərəcədə artırır.

Bu uğurlu tibbi müdaxilə icbari tibbi sığortanın imkanlarının artması və regionlarda yüksək ixtisaslı xidmətlərin əlçatan olmasının bariz nümunəsidir. Eyni zamanda, bu cür əməliyyatların yerli səhiyyə müəssisələrində icrası əhaliyə xaricə getmədən yüksək texnoloji tibbi xidmətlərdən faydalanmaq imkanı yaradır.

İcbari Tibbi Sığorta üzrə Dövlət Agentliyi