Bu ilin may ayında ABŞ-ın Merilend ştatında ən azyaşlı pasiyentlərdən birinə donor orqan köçürülüb. Donorunu gözləyən Lüsinin anası Çelsi hamiləlik dövründə ciddi bir problem yaşamamışdı. Lakin sonuncu müayinədə həkimlər körpənin amniotik mayesinin azaldığını və böyrəklərinin böyüdüyünü müəyyən etdilər. Vaxt itirmək olmazdı – həkimlər Çelsinin dərhal doğuma alınmasına qərar verdilər. Lüsi vaxtından əvvəl dünyaya gəldi və doğulan andan vəziyyəti ağır idi.

Azmedinfo.az kiçik Lüsinin böyük mübarizəsi haqqında hekayəni təqdim edir:

Həkimlər valideynlərə bildirdilər ki, Lüsinin böyrəkləri kistik quruluşludur və ona əvvəlcə dializ, daha sonra isə böyrək transplantasiyası lazım olacaq. Körpəyə peritoneal dializ üçün kateter, mərkəzi venoz xətt və qidalanmanı təmin etmək üçün mədə borusu yerləşdirildi. Transplantasiya üçün Lüsinin çəkisi azı 9 kiloqram olmalı idi, lakin o, yalnız 7,2 kiloqrama qədər arta bildi.

Bir yaşına yaxın Lüsü göbələk infeksiyasına yoluxdu və bu səbəbdən peritoneal dializ dayandırıldı. Bundan sonra o, gündəlik hemodializə keçdi. Ancaq çəkisinin artmaması valideynlərini ciddi narahat edirdi. Onlar cərrahla görüşdülər və həkim Lüsiyə böyrək köçürülməsinin artıq mümkün olduğunu bildirdi.

Atasının böyrəyi uyğun gəldi və hazırlıqlara başlanıldı. Lakin əməliyyata bir neçə gün qalmış ailəyə xəbər verildi ki, vəfat etmiş bir şəxsdən donor böyrəyi tapılıb.

Əməliyyat uğurla keçdi. Lakin sağalma mərhələsində Lüsi qıcolma keçirdi və bir müddət süni tənəffüs aparatına qoşuldu. Yeni böyrəyin tam fəaliyyətə başlaması üçün iki həftədən çox vaxt lazım gəldi. Nəhayət, böyrək funksiyalarını bərpa etdi və Lüsi evə buraxıldı.

“Bizim üçün bu, bir möcüzə idi,” – deyə atası Con bildirir.

Lüsinin həyata qayıtması yalnız bir ailənin deyil, bütöv bir cəmiyyətin mərhəmət və dəstəyinin nəticəsidir. Orqan donorluğu haqqında düşünmək, bəzən bir körpənin sabahını xilas etmək deməkdir.

Orqan Donorluğu və Transplantasiyası üzrə Koordinasiya Mərkəzi