Azərbaycan Qida Təhlükəsizliyi İnstitutunun (AQTİ) sədr müavini Ramazan Nəbiyev müsahibəsində bildirib ki, yeni layihə çərçivəsində xammaldan istehlakçıyadək bütün qida zənciri mərhələləri real vaxtda izləniləcək.

Azmedinfo.az xəbər verir ki, layihə istehlakçıların təhlükəsiz və keyfiyyətli qidaya çıxışını artırmaq məqsədi daşıyır.

O qeyd edib ki, AQTİ hazırda ölkədə 17 müasir laboratoriya və 8 mobil laboratoriya ilə fəaliyyət göstərir. Bu laboratoriyalar mikrobioloji, toksikoloji, radioloji və digər sınaqları həyata keçirir. Qida təhlükəsizliyi sahəsində analizlər beynəlxalq standartlara uyğun avadanlıqla aparılır və kadr potensialı mütəmadi təlimlərlə gücləndirilir.

Nəbiyev qida riskləri arasında pestisid və antibiotik qalıqları, gigiyenik tələblərə əməl olunmaması, həmçinin qeyri-sağlam qidalanma vərdişlərini göstərib. Risklərin azaldılması üçün maarifləndirmə layihələri icra olunur: “Sağlam məktəbli”, “Şəkəri azalt, ömrünü uzat!” və digər təşəbbüslər əhalini düzgün qidalanmaya təşviq edir.

Müsahibədə həmçinin AQTİ-nin beynəlxalq əməkdaşlıqlar, elmi araşdırmalar və institusional inkişaf sahəsindəki fəaliyyəti də vurğulanıb.