Milli Hidrometeorologiya Xidmətinin məlumatına görə, iyunun 9-dan 11-dək Azərbaycanın bəzi dağlıq və dağətəyi rayonlarında hava şəraitinin fasilələrlə yağıntılı olacağı, şimşək çaxacağı gözlənilir. Ayrı-ayrı ərazilərdə yağıntıların qısamüddətli leysan xarakterli olacağı, dolu düşəcəyi ehtimalı da var. Gözlənilən intensiv yağıntılar nəticəsində çaylarda sululuğun artacağı, bəzi dağ çaylarından isə qısamüddətli sel və daşqın keçəcəyi proqnozlaşdırılır.

Azmedinfo.az belə hava şəraitində sağlamlıq və təhlükəsizliklə bağlı tövsiyələri izləyiciləri ilə paylaşır:

Xroniki tənəffüs və oynaq xəstəliklərindən əziyyət çəkənlər, rütubətli və dəyişkən hava şəraitinə qarşı ehtiyatlı olmalı, isti geyimlərə üstünlük verməlidirlər.

Şimşəkli havada açıq ərazilərdə qalmaq, metal əşyalar və ağacların altında sığınmaq təhlükəlidir.

Dağlıq ərazilərə səyahət edənlər və ya kənd təsərrüfatı işləri ilə məşğul olanlar sel və daşqın təhlükəsini nəzərə alaraq ehtiyat tədbirləri görməlidirlər.

Avtomobil sürücüləri güclü yağış və yol qəzaları riskini nəzərə alaraq sürət həddinə və məsafəyə xüsusi diqqət yetirməlidirlər.

Dolu yağması ehtimalı səbəbilə açıq sahələrdə avtomobillərin saxlanması tövsiyə olunmur.

Hər kəsə hava şəraitinə uyğun davranmağı və rəsmi qurumların xəbərdarlıqlarını diqqətdə saxlamağı tövsiyə edirik.