Əsgərov İlkin Zakir oğlu bir müddət öncə həyatının həm ən çətin, həm də ən ümidverici sınağından keçib. Böyrək çatışmazlığından əziyyət çəkən İlkin bəyin səhhəti son illərdə davamlı şəkildə pisləşib. Lakin o, nə ümidini itirib, nə də mübarizədən vaz keçib. 2024-cü ilin mart ayında isə həyatında dönüş nöqtəsi baş verib — atası ona donor olub və uğurlu transplantasiya əməliyyatı həyata keçirilib.

Azmedinfo.az xəbər verir ki, İlkin Əsgərovun sözlərinə görə, böyrəklərində ilk problemlər 2021-ci ildə başlayıb: “Əvvəlcə bunun müalicə ilə keçəcəyini düşündük. Amma 2022-ci ildə artıq dializ müalicəsinə başladım. Ayda üç dəfə saatlarla aparata qoşulmaq həm fiziki, həm də psixoloji baxımdan çox ağır idi.”

Əməliyyata qədərki dövr İlkin üçün olduqca çətin keçib: “Dializ zamanı halım tez-tez pisləşirdi. Yuxusuzluq, halsızlıq, təzyiq... Uşaqlarımla vaxt keçirmək istəyirdim, amma gücüm çatmırdı. Həkimlər transplantasiyadan başqa yol qalmadığını dedilər.”

Müalicə ilə bağlı araşdırmalar aparan İlkin bəy, böyrək transplantasiyasının dövlət hesabına və tam ödənişsiz həyata keçirildiyini öyrənərək, Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinə (ODTKM) müraciət edir.

“Mərkəzdə çox səmimi qarşılandım. İşçi heyət olduqca anlayışlı və diqqətli idi. Qısa müddətdə sənədlərim hazırlandı,” – deyə o xatırlayır.

Əməliyyat tanınmış transplantoloq Mircəlal Kazıminin rəhbərliyi ilə uğurla icra olunur.

“Mircəlal həkimə, həmçinin ODTKM rəhbərliyinə dərin təşəkkür edirəm. Onların dəstəyi və operativliyi olmasaydı, bu qədər tez sağlamlığıma qovuşa bilməzdim,” – deyə İlkin minnətdarlığını ifadə edir.

Artıq İlkin Əsgərov aktiv və sağlam həyat tərzi sürür. Gün ərzində 10 min addım atır, pəhrizə əməl edir, artıq çəkidən azad olub – 104 kiloqramdan 92 kiloqrama düşüb. Dializin ürəyində yaratdığı problemlər də aradan qalxıb.

“Sabah-axşam piyada gəzirəm, qidalanmama xüsusi diqqət yetirirəm. Kreatinin səviyyəsini aşağıda saxlamağa çalışıram. Ən önəmlisi odur ki, indi normal həyat yaşayıram,” – deyə İlkin bildirir.

Gələcəklə bağlı arzuları isə ailəsinə yönəlib. Goranboy rayonunun Zeynallı kəndində yaşayan İlkin Əsgərovun ən böyük istəyi övladlarının yaxşı təhsil alması, sağlam gələcək qurması və layiqli insanlar kimi yetişməsidir.

Orqan Donorluğu və Transplantasiyası üzrə Koordinasiya Mərkəzi