İyunun 12-13-də Qazaxıstanın tarixi Türküstan şəhərində kardiologiya sahəsinin ən böyük elmi forumlarından biri — Türk Dövlətləri Kardioloqlarının II Qurultayı və beynəlxalq iştirakla Qazaxıstan Kardioloqlarının XVII Qurultayı uğurla keçirildi.

Azmedinfo.az xəbər verir ki, 2024-cü ilin aprel ayında Bakıda təşkil olunan I Türk Dövlətləri Kardioloqlar Qurultayının uğurlu davamı kimi keçirilən bu II qurultayın əsas məqsədi ürək-damar xəstəliklərinin diaqnostikası, müalicəsi və profilaktikasında qazaxıstanlı və xarici mütəxəssisləri bir araya gətirmək, təcrübə mübadiləsini təmin etmək və kardiologiyanın son yeniliklərini işıqlandırmaq idi.

Azərbaycanı tədbirdə Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşova və nümayəndə heyəti təmsil etdi. Açılış mərasimində professor Gülnaz Dadaşova II Türk Dövlətləri Kardioloqlar Qurultayının sədrliyini Qazaxıstan tərəfinə təntənəli şəkildə təqdim etdi. Çıxışında o, qurultayın əhəmiyyətini, Türk Dövlətləri arasında dostluğun və səhiyyə əməkdaşlığının möhkəmlənməsini vurğuladı.

Professor Gülnaz Dadaşovanın sədrliyi ilə keçirilən “Türk Dövlətləri Kardioloqlar Qurultayı” sessiyasında o, “Kardiologiyada nailiyyətlər: Azərbaycanda əlçatanlığın və innovasiyanın genişləndirilməsi” mövzusunda çıxış etdi. Eyni zamanda, ETKİ-nin elmi katibi t.ü.f.d. Təranə Cavadova “Ekologiya — ekoloji risk faktorları və ürək-damar xəstəlikləri”, t.ü.f.d. Vüsal Hacıyev isə “Azərbaycanda TAVİ-nin tətbiqi. Keçid səhiyyə sistemində strateji və sistemli perspektiv” mövzularında çıxışlar etdilər.

Bu unikal tədbir Qazaxıstan, Azərbaycan, Türkiyə, Özbəkistan, Qırğızıstan, Türkmənistan, Rusiya, Belarus, Almaniya, İtaliya, Portuqaliya və Avstraliyadan yüzdən çox görkəmli mütəxəssisi — aparıcı kardiologiya məktəblərinin və tədqiqat mərkəzlərinin nümayəndələrini bir araya gətirdi. Qurultayın proqramı arterial hipertenziyadan başlayaraq kardiogenetikada ən son yanaşmalara, süni intellektin kardiologiyada tətbiqinə qədər geniş və aktual mövzuları əhatə etdi.

Bu forum, Türk Dövlətləri arasında elmi əməkdaşlığın, təcrübə paylaşımının və səhiyyə sahəsində birgə inkişafın güclü zəminini yaratdı.