Hər bir insanın həyatında sağlamlıq qədər dəyərli bir nemət yoxdur. Bu qiymətli nemətin qorunmasında, bərpasında və davamlılığında isə tibb işçilərinin rolu əvəzsizdir. Azərbaycanda hər il 17 iyun tarixi Tibb İşçilərinin Peşə Bayramı kimi qeyd olunur. Bu gün, səhiyyə sahəsində çalışan həkimlərə, tibb bacılarına, feldşerlərə, laborator mütəxəssislərinə, sanitar işçilərə və digər bütün səhiyyə əməkdaşlarına dərin minnətdarlıq və ehtiram günüdür.

Bu bayramın təsis olunması ulu öndər Heydər Əliyevin 2001-ci ildə imzaladığı sərəncamla rəsmi olaraq qeyd edilməyə başlanıb. Məqsəd – tibb sahəsində çalışan minlərlə insanın fədakar əməyini tanıtmaq, onların cəmiyyətə verdiyi töhfəni qiymətləndirməkdir.

Tibb işçilərinin fəaliyyəti təkcə xəstələrin müalicəsi ilə məhdudlaşmır. Onlar həm də sağlamlığın qorunması, xəstəliklərin profilaktikası, maarifləndirici tədbirlərin təşkili, pandemiya və digər fövqəladə hallarda ön cəbhədə mübarizə kimi çoxşaxəli və məsuliyyətli bir missiyanı yerinə yetirirlər.

Xüsusilə son illərdə, COVID-19 pandemiyası dövründə, tibb işçilərinin insanlıq və peşəkarlıq naminə apardığı mübarizə bir daha sübut etdi ki, bu peşə sadəcə bir ixtisas deyil – bu, həm də bir çağırış, əzmkarlıq və humanizm yoludur.

Bu günün simasında, hər bir sağlam körpənin ilk müayinəsini aparan pediatrı, uzaq dağ kəndində səhərdən axşama qədər xidmət göstərən feldşeri, ağır əməliyyat masası arxasında həyat qurtaran cərrahı, gecə-gündüz laboratoriyada analizlər üzərində çalışan bioloqu və hər bir tibb peşə sahibini böyük sayğı ilə anırıq.

Azmedinfo.az kollektivi olaraq bütün tibb işçilərini bu əlamətdar gün münasibətilə səmimi-qəlbdən təbrik edirik!

Sizə möhkəm can sağlığı, yüksək peşə uğurları və hər zaman sağlam həyat diləyirik!

Çünki Sizin sağlığınız – bizim ümidimizdir!