Professor Gülnaz Dadaşova:

Professor Gülnaz Dadaşova: "Azərbaycan səhiyyəsi beynəlxalq səviyyəyə doğru irəliləyir"

18 İyun 2025

376

Səhiyyə Nazirliyi Elmi-Tədqiqat Kardiologiya İnstitutunda Tibb işçilərinin peşə bayramı günü qeyd edilib.

Azmedinfo.az xəbər verir ki, açılışda çıxış edən Elmi-Tədqiqat Kardiologiya İnstitutunun direktoru, professor Gülnaz Dadaşova hər il iyunun 17-si tarixinin xalqımızın ümummilli lideri Heydər Əliyevin 2001-ci il iyunun 4-də imzaladığı Sərəncama əsasən, ölkəmizdə Tibb İşçilərinin Peşə Bayramı Günü kimi qeyd olunduğunu deyib.

Professor vurğulayıb ki, son illər Azərbaycan səhiyyəsinin idarə olunması, tibb müəssisələrinin maddi-texniki bazasının gücləndirilməsi, yeni tibbi texnologiyaların tətbiqi, köklü kadr islahatları və aparılan digər tədbirlər respublikamızda bu sahənin dünyanın qabaqcıl ölkələrinin səviyyəsinə çıxarmağa imkan yaradıb.

Tədbirdə çıxış edən digər natiqlər həmçinin qeyd ediblər ki, ölkəmizdə 700-dən artıq yeni tikilmiş və ya əsaslı təmirdən çıxmış tibb müəssisəsi müasir avadanlıqlarla təmin olunub. Aparılan islahatlar, maddi-texniki bazanın təkmilləşdirilməsi, təchizat və kadr hazırlığı ilə bağlı görülən işlər əhalinin dövlət tibb müəssisələrinə olan inamını getdikcə artırır.

Tədbirin sonunda müəssisədə çalışan əməkdaşlar tibbdə göstərdikləri xidmətlərə görə rəhbərlik tərəfindən təltif olundular.