İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi (TƏBİB), Türk Əməkdaşlıq və Koordinasiya Agentliyinin (TİKA Bakı) dəstəyi ilə uşaqların sağlamlığının qorunması istiqamətində yeni bir təşəbbüsə start verir.

Azmedinfo.az xəbər verir ki, “Regionlarda uşaqların müayinəsi” adlı layihə çərçivəsində ölkə üzrə uşaq əhalisinin vaxtında tibbi yoxlamadan keçməsi, erkən diaqnostika və profilaktik tədbirlərin gücləndirilməsi hədəflənir.

Layihənin ilk mərhələsi 20–21 iyun 2025-ci il tarixlərində Ucar Rayon Mərkəzi Xəstəxanasında həyata keçiriləcək. Müayinələr zamanı müxtəlif ixtisaslı pediatrik həkimlər tərəfindən uşaqların sağlamlıq vəziyyəti qiymətləndiriləcək, ehtiyac olduğu halda əlavə müayinələr və müalicə tədbirləri üçün istiqamətlər veriləcək.

Müayinələrdən keçmək istəyən valideynlər Ucar Rayon Mərkəzi Xəstəxanasına yaxınlaşaraq bu fürsətdən yararlana bilərlər. Bu təşəbbüs regionlarda sağlamlıq imkanlarının əlçatanlığının artırılması və uşaqlara erkən yaşlardan diqqətin göstərilməsi baxımından əhəmiyyətli bir addımdır.