İyunun 21-də Bakıda keçirilən “Mədə xərçənginə müasir baxış – hər yönü ilə mədə xərçəngi” adlı elmi-praktik konfransda Azərbaycan Cərrahiyyə, Qastroenterologiya və Onkologiya Assosiasiyasının sədri, onkoloq Altay Əliyev açılış nitqi ilə çıxış edib.

Azmedinfo.az xəbər verir ki, həkim tədbir iştirakçılarını salamlayaraq bildirib ki, gələcəkdə konfransın indiki mövzusunda daha geniş tərkibli və məlumat dolu tədbirlərin keçirilməsi hədəflənir.

Altay Əliyev qeyd edib ki, konfransın əsas məqsədi mədə xərçəngi ilə bağlı cəmiyyətdə və tibbi ictimaiyyətdə fərqindəlik yaratmaq, bu xəstəliyə diqqəti artırmaq və xəstəliyin müalicəsi, əməliyyat incəlikləri ilə bağlı elmi müzakirələr aparmaqdır:

“Hər birimiz bilirik ki, tibb dəqiq riyaziyyat deyil, amma riyazi və statistik qanunlara tabe olan bir təbiət elmidir. Elmin hələ bilmədikləri, bildiklərindən daha çoxdur. Ona görə də ortaq fikir və ortaq ağıl olduqca önəmlidir.”

O, çıxışında Azərbaycanda mədə xərçənginin geniş yayılmış xəstəliklər arasında yer aldığını da vurğulayıb:

“Mədə xərçəngi ölkəmizdə görülmə sıxlığına görə üçüncü, ölüm göstəricilərinə görə isə yenə üçüncü sıradadır. Bu, artıq təkcə tibbi deyil, ümummilli məsələdir. Biz həkimlər vətəndaşlarımızın sağlamlığını qorumaq və ölüm nisbətlərini azaltmaq üçün əlimizdən gələni etməliyik.”

Altay Əliyev həmçinin mədə xərçənginin tarixindən maraqlı bir nüansa da toxunaraq fransız sərkərdəsi Napoleon Bonapartın ömrünün son günlərində bu xəstəlikdən əziyyət çəkdiyini, atasının və babasının da bilinməyən qarın ağrılarından əziyyət çəkdiyini və Napoleonun ölümündən əvvəl öz bədəninin araşdırılmasını istədiyini qeyd edib. O bildirib ki, bu fakt insanoğlunun öz irqini və gələcəyini qorumağa verdiyi önəmin göstəricisidir:

“Biz də insanlarımız və gələcəyimiz üçün bu xəstəliyi dərindən öyrənməli, yeni elmi yanaşmalarla mübarizəyə qatılmalıyıq.”

Sonda professor Altay Əliyev konfrans çərçivəsində radyoloq, patoloq və cərrah həmkarların, eləcə də gənc tibb tələbələrinin iştirakı ilə aparılan və yaxın günlərdə “Gastrointestinal Cərrahi” jurnalında dərc edilmiş araşdırmanın da təqdim olunacağını diqqətə çatdırıb. Araşdırma bədən ölçü parametrlərinin müalicə proqnozuna və doz reduksiyasına təsirini əhatə edir.

“Bu cür elmi əməkdaşlıqlar toplantını daha da maraqlı və məhsuldar edəcək,” – deyə Altay Əliyev çıxışını tamamlayıb.