Səhiyyə Nazirliyinin Respublika Gigiyena və Epidemiologiya Mərkəzi ötən illə müqayisədə ölkədə infeksion xəstəliklərə yoluxma göstəricilərində azalma olduğunu bildirir.

Azmedinfo.az xəbər verir ki, qurumun verdiyi məlumata görə, hazırda ölkə ərazisində qızılca xəstəliyinə rast gəlinmir, bu isə aparılan profilaktik tədbirlərin və peyvəndləmə işlərinin effektivliyindən xəbər verir.

“Qızılcaya qarşı profilaktik tədbirlər çərçivəsində ölkənin bütün müalicə-profilaktika müəssisələrində peyvəndləmə işi ardıcıl şəkildə davam etdirilir. Əhali, xüsusilə uşaqlar arasında immunlaşdırma səviyyəsinin yüksəldilməsi, xəstəliyin yayılmasının qarşısını alır”, – deyə mərkəzdən bildirilib.

Bununla yanaşı, suçiçəyi xəstəliyinə yoluxma hallarında da ötən ilin eyni dövrü ilə müqayisədə azalma müşahidə olunur. Mütəxəssislər bunu həm sanitar maarifləndirmə tədbirləri, həm də ümumi gigiyena səviyyəsinin artması ilə əlaqələndirirlər.

Qurumun nümayəndələri vətəndaşlara vaxtında peyvənd olunmağı, kütləvi tədbirlərdə gigiyenaya diqqət yetirməyi və yoluxucu xəstəliklərə qarşı ayıq-sayıq olmağı tövsiyə edirlər.